ರವಿ ಕಾಣದ್ದು

   ಮೂಲ: ರೇಮಂಡ್ ಕಾರ್ವರ್  ಅನುವಾದ: ಸಿ ಪಿ ರವಿಕುಮಾರ್ ಇಂದು ಬೆಳಗ್ಗೆ ಬೇಗ ಎಚ್ಚರವಾಗಿ  ಹಾಸಿಗೆಯ ಮೇಲೆ ಎದ್ದು ಕೂತಾಗ ದೂರದಲ್ಲಿ ಕಂಡಿತು ಸಮುದ್ರದ ಮೇಲೆ ಒಂಟಿ ದೋಣಿಯೊಂದು  ಒಂದೇ ದೀಪದ ಬೆಳಕಿನಲ್ಲಿ ಅಲೆಗಳ ಮೇಲೆ ತಡವರಿಸುತ್ತಾ ಸಾಗುತ್ತಿತ್ತು. ನನಗೆ ಒಮ್ಮೆಲೇ ನೆನಪಾಯಿತು ನನ್ನ ಸ್ನೇಹಿತನೊಬ್ಬ ಪೆರುಜಿಯಾ ಪ್ರದೇಶದ ಬೆಟ್ಟಗಳ ಮೇಲಿಂದ ತನ್ನ ಸ್ವರ್ಗಸ್ಥ ಹೆಂಡತಿಯ ಹೆಸರು ಕೂಗಿ ಕರೆಯುತ್ತಿದ್ದ. ಅವಳು ಸತ್ತ ಎಷ್ಟೋ ವರ್ಷಗಳ ತನಕ ಊಟ ಮಾಡುವಾಗ  ಟೇಬಲ್ ಮೇಲೆ ಅವಳಿಗಾಗಿ ಬಡಿಸಿ ಕೂಡುತ್ತಿದ್ದ. ಅವಳಿಗೆ ಶುದ್ಧಗಾಳಿ ಬೇಕೆಂದು ಕಿಟಕಿ ತೆರೆಯುತ್ತಿದ್ದ. ಈ ಬಗೆಯ ಪ್ರದರ್ಶನ ನನಗೆ ಮುಜುಗರ ಎನ್ನಿಸುತ್ತಿತ್ತು. ಅವನ ಇನ್ನಿತರ ಸ್ನೇಹಿತರಿಗೂ ಕೂಡ. ನನಗೆ ಅದೇನೆಂದು ಅರ್ಥವಾಗುತ್ತಿರಲಿಲ್ಲ. ಇಂದು ಬೆಳಗಿನವರೆಗೂ.

ವಸಂತದಲ್ಲಿ ದಶಸಹಸ್ರ ಹೂರಾಶಿ ಸಂಭ್ರಮ ಶರತ್ಕಾಲ ಬೆಳ್ದಿಂಗಳ ನೊರೆ ಹಾಲು ಚಂದ್ರಮ ವೈಶಾಖದಲ್ಲಿ ತಂಗಾಳಿ ಸುಳಿದಾಗ ಹರ್ಷ ಹಿತವೆನ್ನಿಸುವುದು ಹೇಮಂತದ ಹಿಮವರ್ಷ ಹೇಳು ಯಾವ ಋತು ನಿನಗೆ ಅತ್ಯಂತ ಆಪ್ಯಾಯಮಾನ? ಯಾವಾಗ ಅನಗತ್ಯ ಆಲೋಚನೆಯಿಂದ ಮುಕ್ತವೋ ಮನ! ಮೂಲ: ವು ಮೆನ್  ಕನ್ನಡಕ್ಕೆ: ಸಿ ಪಿ ರವಿಕುಮಾರ್ 

  ಹಿಂದಿ ಮೂಲ: ಅಜ್ಞೇಯ ಕನ್ನಡ ಅನುವಾದ: ಸಿ ಪಿ ರವಿಕುಮಾರ್ ಚಹಾ ಕುಡಿಯುತ್ತಾ ನಾನು ಅಪ್ಪನ ಬಗ್ಗೆ ಯೋಚಿಸುತ್ತಿದ್ದೇನೆ. ನೀವು ಎಂದಾದರೂ  ಚಹಾ ಕುಡಿಯುವಾಗ ನಿಮ್ಮ ತಂದೆಯ ಬಗ್ಗೆ ಯೋಚಿಸಿದ್ದೀರಾ? ಒಳ್ಳೆಯದಲ್ಲ ಅಪ್ಪಂದಿರ ಬಗ್ಗೆ ಯೋಚಿಸುವುದು. ನಮ್ಮ ಕಲಾಯಿ ಇಳಿದು ಹೋಗುತ್ತದೆ. ನಾವು ಬೇರೆ ಏನಾದರೂ ಆಗಬಹುದಿತ್ತು. ಈ ಆಲೋಚನೆಯ ತೊಂದರೆ ಏನೆಂದರೆ ನಾವು ಬೇರೇನಾದರೂ ಆಗಿದ್ದರೆ  ಬಹುಶಃ ನಮ್ಮ ತಂದೆಗೆ ಇನ್ನಷ್ಟು ಹತ್ತಿರವಾಗುತ್ತಿದ್ದೆವು ಇನ್ನಷ್ಟು ಅಪ್ಪನಂತೆ ಆಗುತ್ತಿದ್ದೆವು  ಎಂಬ ಸಾಕ್ಷಾತ್ಕಾರವಾಗುವುದು. ಅಪ್ಪನಂತೆ ಆಗಲು ಎಷ್ಟು  ದೂರ ಹೋಗಬೇಕಾಗುತ್ತದೆ ಅಪ್ಪನಿಂದ. ಅಪ್ಪನಿಗೂ ಬೆಳಗ್ಗೆ ಚಹಾ ಕುಡಿಯುವ ಅಭ್ಯಾಸವಿತ್ತು. ಅವರೂ ಯೋಚಿಸುತ್ತಿದ್ದರೆ  ತಮ್ಮ ಅಪ್ಪನ ಕುರಿತು? ಹತ್ತಿರವಾಗಿಯೋ ಅಥವಾ ದೂರವಾಗಿಯೋ?

ಮೂಲ : ರೇಮಂಡ್ ಕಾರ್ವರ್ ಅನುವಾದ: ಸಿ ಪಿ ರವಿಕುಮಾರ್  ಇವತ್ತು ಎದ್ದಾಗ ಯಾಕೋ ಇಡೀ ದಿವಸ ಮಲಗಿ ಹಾಸಿಗೆಯಲ್ಲೇ ಓದುವ ಖಯಾಲಿ. ಒಂದು ನಿಮಿಷ ಹೋರಾಡಿದೆ  ಅದಮ್ಯ ಆಸೆಯ ಜೊತೆಗೆ. ನಂತರ ಕಿಟಕಿಯಿಂದ ಹೊರಗೆ ಇಣುಕಿ ಸುರಿಯುವ ಮಳೆಯನ್ನು ನೋಡಿ ಸೋಲೊಪ್ಪಿಕೊಂಡೆ. ಇಡೀ ದಿವಸ ಬೆಳಗಿನ ಮಳೆಯ ಸುಪರ್ದಿಗೆ  ನನ್ನನ್ನು ಒಪ್ಪಿಸಿಕೊಂಡೆ. ನಾನು ಜೀವನವನ್ನು ಮತ್ತೊಮ್ಮೆ ಬದುಕಿದರೆ ಇಂಥ ತಪ್ಪನ್ನು ಮಾಡುವೆನೇ ಪುನಃ? ಅವಕಾಶ ಸಿಕ್ಕಿದರೆ ಖಂಡಿತಾ ಖಂಡಿತ.

ಕೆನಡಾ ಗಡಿಯಲ್ಲೊಂದು ಅ-ರಾಷ್ಟ್ರೀಯ ಸ್ಮಾರಕ  ಮೂಲ: ವಿಲಿಯಮ್ ಸ್ಟಾಫರ್ಡ್ (ಅಮೆರಿಕಾ ಸಂಸ್ಥಾನ)  ಕನ್ನಡಕ್ಕೆ: ಸಿ. ಪಿ. ರವಿಕುಮಾರ್  ಇದು ಯಾವ ಯುದ್ಧವೂ ನಡೆಯದ ಮೈದಾನ, ಯಾವ ಅನಾಮಧೇಯ ಸೈನಿಕನೂ ಇಲ್ಲಿ ಬಿಡಲಿಲ್ಲ ಪ್ರಾಣ, ಇಲ್ಲಿ ಕೈ ಹಿಡಿದವು ಎರಡೂ ಕಡೆ ಬೆಳೆದ ಹುಲ್ಲುಗರಿಕೆ, ಯಾವುದೇ ಸ್ಮಾರಕವನ್ನೂ ಕಟ್ಟಿಲ್ಲ ಅದಕ್ಕೆ, ಇಲ್ಲಿ ಕಾಣುವ ಏಕಮಾತ್ರ ವೀರ ಚಿಹ್ನೆ ಮುಕ್ತಗಗನ.   ಹಕ್ಕಿಗಳು ಹಾರಾಡುತ್ತವೆ ನಿಶ್ಶಬ್ದವಾಗಿ ಇಲ್ಲಿ  ರೆಕ್ಕೆ ಬಿಚ್ಚಿ ಮುಕ್ತವಾಗಿ ತೆರೆದ ಬಾನಿನಲ್ಲಿ, ಯಾರೊಬ್ಬರೂ ಸಾಯಲಿಲ್ಲ ಈ ಬಯಲಿನ ಮೇಲೆ, ಎಷ್ಟು ಪಳಗಿದೆ ಬಯಲುಗಾಳಿ, ನಿರ್ಲಕ್ಷ್ಯದಿಂದೆಷ್ಟು ಪವಿತ್ರವಾಗಿದೆ ಬಯಲೆಂದರೆ, ಇದರ ಹೆಸರನ್ನು ಮರೆಯುವುದೇ ಜನರು ಕೊಟ್ಟ ಬಳುವಳಿ.  At the Un-National Monument Along the Canadian Border Birds fly here without any sound, unfolding their wings across the open. No people killed — or were killed — on this ground hallowed by neglect and an air so tame that people celebrate it by forgetting its name. —William E. Stafford

  ಎಲ್ಲಿ ಕಾಣಲೇ ಇಲ್ಲವಲ್ಲ ಬಹಳ ದಿನ ಎಲ್ಲಿ ಹಾರಲು ಪ್ರೇರೇಪಿಸಿತು ಮನ! ಒಮ್ಮೊಮ್ಮೆಯಾದರೂ ಹಾಕುತ್ತಿರು ಸ್ವಂತಿ ಲೈಕ್ ಹಾಕಲಿ ಬಿಡಲಿ ಜನರು! ಏನಂತೀ? ಗೆಳೆಯರಾದ ಮೇಲೆ ಸ್ನೇಹ ಯಾಚಿಸಿ ಬಂದು ಕಾಣೆಯಾಗುವರಲ್ಲ ಕೆಲವು ಫೇಸ್ಬುಕ್ ಬಂಧು ಅವರಂತೆ ನೀನೂ ತಲೆ ಮರೆಸಿಕೊಂಡು ಹೋಗಿಬಿಟ್ಟೆಯೋ ಏನೋ ಮಾಡಿ ಅನ್ಫ್ರೆಂಡು! ಟ್ವೀಟ್ ಮಾಡುತ್ತಿರುವುದೆಲ್ಲ ಗೂಗೆ-ರಣಹದ್ದು ಎಂದು ನಿಲ್ಲಿಸಿಬಿಟ್ಟೆಯಾ ನಿನ್ನ ಚಿಲಿಪಿಲಿ ಸದ್ದು! ಯಾರೂ ಕಿವಿ ಮುಚ್ಚುವುದಿಲ್ಲ, ನಿನಗೇಕೆ ಚಿಂತೆ ನಿನ್ನುಲಿಗೇ ಕಾದಿರಬಹುದು ಗದ್ದಲದ ಸಂತೆ!