ರವಿ ಕಾಣದ್ದು

ಪಾನ್ ಗೋಡೆ ಈಗ ಹೇಗಿದೆಯೋ ಗೊತ್ತಿಲ್ಲ. ನಾನು ಐಐಟಿ ದೆಹಲಿ ಸೇರಿದಾಗ ನನಗೆ ಬಹಳ ಶಾಕ್ ಆಗಿದ್ದು ಆ ಗೋಡೆಯನ್ನು ನೋಡಿ.  ವಿವಿಧ ಡಿಪಾರ್ಟ್ಮೆಂಟ್ ಕಚೇರಿಗಳು ಇರುವ ಕಟ್ಟಡಕ್ಕೂ ಮತ್ತು ಆಡಳಿತ ವರ್ಗದವರು ಕೂಡುವ ಕಟ್ಟಡಕ್ಕೂ ನಡುವೆ ಒಂದು ಒಳದಾರಿ ಇತ್ತು.  ಮೊದಲನೇ ಮಹಡಿಯಲ್ಲಿದ್ದ ನಮ್ಮ ಡಿಪಾರ್ಟ್ಮೆಂಟ್ನಿಂದ ಈ ದಾರಿ ಬಳಸಿಕೊಂಡು ಹೋಗುವಾಗ ಡೀನ್ ಮುಂತಾದವರ ಕಚೇರಿಗಳು ಮೊದಲು ಸಿಕ್ಕುತ್ತಿದ್ದವು. ಅನಂತರ ಒಂದು ಓಣಿಯಂತಹ ದಾರಿ ಸಿಕ್ಕುತ್ತಿತ್ತು.  ಈ ಓಣಿಯನ್ನು ನಾನು ಮೊದಲ ಸಲ ನೋಡಿದಾಗ ನನಗೆ ಆಘಾತವೇ ಆಗಿತ್ತು. ಅಕ್ಕಪಕ್ಕದ ಗೋಡೆಗಳ ಮೇಲೆಲ್ಲಾ ಕೆಂಪು ಗುರುತುಗಳು. ಇವು ಪಾನ್ ಜಗಿದು ಉಗಿದ ಗುರುತುಗಳು ಎಂದು ನಂತರ ತಿಳಿಯಿತು. ಪಾನ್ ಕಲೆಯ ಓಣಿಯನ್ನು ದಾಟಿ ಹೋದರೆ ಕಾರಕೂನರು ಕುಳಿತುಕೊಳ್ಳುವ ಕೋಣೆ ಸಿಕ್ಕುತ್ತಿತ್ತು. ಇಲ್ಲಿ ಹೋಗಬೇಕಾಗಿ ಬರುವ ಸಂದರ್ಭಗಳನ್ನು ನಾನು ದ್ವೇಷಿಸುತ್ತಿದ್ದೆ. ನಾನು ಹೋದಾಗ ನಮ್ಮ ಡಿಪಾರ್ಟ್ಮೆಂಟ್ ಕೆಲಸಗಳಿಗೆ ನಿಯುಕ್ತನಾಗಿದ್ದ ಕಾರಕೂನ ಬಹುತೇಕ ಸೀಟಿನ ಮೇಲೆ ಇರುತ್ತಲೇ ಇರಲಿಲ್ಲ. ಎಲ್ಲಿ ಎಂದರೆ ಚಾಯ್ ಪೇ ಗಯೇನ್ ಹೈನ್ ಜೀ ಎಂಬ ನಿರಾಳ ಉತ್ತರ ಸಿಕ್ಕುತ್ತಿತ್ತು. ನಾನು ಕಬ್ ಆಯೇಂಗೇ ಎಂದು ಮರುಪ್ರಶ್ನೆ ಕೇಳಿದೆನೋ ನನ್ನನ್ನು ಕೆಕ್ಕರಿಸಿ ನೋಡಿ ಅಬ್ ಚಾಯ್ ಪೇ ಗಯೇನ್ ಹೈನ್ ಆತೇ ಹೋಂಗೆ ಎಂಬ ಪ್ರತ್ಯುತ್ತರ ಸಿಕ್ಕುತ್ತಿತ್ತು.  ಈ ಕಾರಕೂನರಿಗೆ ಟೀಚಿಂಗ್ ಸ್ಟಾಫ್ ಎಂದರೆ ಅಸಹನೆ ಇತ್ತು. ಏನ...

 ವಾಲ್ಟ್ ಡಿಸ್ನಿ ವರ್ಲ್ಡ್, ಎಪ್ಕಾಟ್ ಸೆಂಟರ್ ಮತ್ತು ಸೀ ವರ್ಲ್ಡ್ ಇವುಗಳನ್ನು ಒಂದಲ್ಲ ಎರಡು ಸಲ ನೋಡುವ ಅದೃಷ್ಟ ನನಗೆ ಬಂತು. ಮೈಸೂರಿನಲ್ಲಿದ್ದವರಿಗೆ ಹೇಗೆ ದಸರಾ ನೋಡಲು ಬಂದ ಅತಿಥಿಗಳ ಜೊತೆಗೆ ದಸರಾ ವೈಭವ ನೋಡಲು ಅನೇಕಾನೇಕ ಅವಕಾಶಗಳು ಬರುತ್ತವೋ ಹಾಗೇ ಫ್ಲಾರಿಡಾ, ಕ್ಯಾಲಿಫೋರ್ನಿಯಾ ಇಂಥ ಕಡೆ ವಾಸವಿದ್ದವರಿಗೆ ಇದೇ ರೀತಿಯ ಅವಕಾಶಗಳು ಬರುತ್ತಿರುತ್ತವೆ. ಮುಂದೆ ನಾನು ಪಿಎಚ್.ಡಿ. ಮಾಡಲು ಕ್ಯಾಲಿಫೋರ್ನಿಯಾಗೆ ಹೋದಾಗ ಡಿಸ್ನಿ ಲ್ಯಾಂಡ್, ಸೀ ವರ್ಲ್ಡ್ ಮುಂತಾದವನ್ನು ಇದೇ ರೀತಿ ಹಲವು ಸಲ ಸುತ್ತಿದ್ದೇನೆ.  ಡಿಸ್ನಿ ವರ್ಲ್ಡ್ ನಮ್ಮಲ್ಲಿನ ಮುಗ್ಧ ಮಗುವನ್ನು ಮತ್ತೊಮ್ಮೆ ಜಾಗೃತಗೊಳಿಸುತ್ತದೆ. ಎಲ್ಲಿ ನೋಡಿದರೂ ಬಣ್ಣ, ಎಲ್ಲಿ ನೋಡಿದರೂ ಕಾರ್ಟೂನ್ ಪಾತ್ರಗಳು, ಎಲ್ಲಿ ನೋಡಿದರೂ ಮ್ಯಾಜಿಕ್. ಅದೇನು ಸಿಂಡರೆಲ್ಲಾ ಅರಮನೆ! ಎಲ್ಲರೊಂದಿಗೆ ಕೈಕುಲುಕುವ ಮಿಕಿ ಮೌಸ್! ಅದೇನು ಮ್ಯೂಸಿಕ್ ಬ್ಯಾಂಡ್! ಎಲ್ಲಕ್ಕಿಂತ ಹೆಚ್ಚಾಗಿ ಸುತ್ತಲೂ ಉಲ್ಲಾಸದಲ್ಲಿರುವ ಜನಸ್ತೋಮ! ನಾನು ನೋಡಿದಾಗಲೂ ಮತ್ತು ಈಗಲೂ ಡಿಸ್ನಿ ವರ್ಲ್ಡ್ ಸಾಕಷ್ಟು ಬದಲಾಗಿರಲು ಸಾಧ್ಯ. ಆಧುನಿಕ ತಂತ್ರಜ್ಞಾನವನ್ನು ಬಳಸಿಕೊಂಡು ಅಲ್ಲಿ ಇನ್ನೂ ಹೊಸ ಬಗೆಯ ಅನುಭವಗಳನ್ನು ಅತಿಥಿಗಳಿಗೆ ನೀಡುತ್ತಿರಬಹುದು. ಅಮೆರಿಕಾದಲ್ಲಿ ಯಾವುದೇ ಸ್ಥಳವು ಕಾಲ ಕಳೆದಂತೆ ಬದಲಾಗುತ್ತಲೇ ಇರುತ್ತದೆ.  ಒಮ್ಮೆ ನನ್ನ ಪೂರ್ವ ಸಹೋದ್ಯೋಗಿ  ಜೀನ್ ಫ್ರಾಂಜ್ ಜೊತೆಗೆ ದೆಹಲಿ, ಚೆನ್ನೈ, ಕೋಲ್ಕತಾ ...

 ಮೌಂಟನ್ ಹೋಮ್ ಬಿಟ್ಟು ಹೊರಡುವ ಸಮಯ ಬಂತು. ಯೋಜನೆಯ ಪ್ರಕಾರ ನಾನು ಅಲ್ಲಿ ಒಂದು ವರ್ಷ ಪೂರ್ತಿ ಕಳೆಯಬೇಕಾಗಿತ್ತು.  ಆದರೆ  ಫ್ಲಾರಿಡಾದಲ್ಲಿ ನಡೆಯುತ್ತಿದ್ದ ಬೇರೊಂದು ಪ್ರಾಜೆಕ್ಟಿನಲ್ಲಿ ಜನ ಬೇಕಾಗಿದ್ದರು. ಹೀಗಾಗಿ ನನ್ನನ್ನು ಸ್ಥಳಾಂತರ ಮಾಡಲು ಕಂಪನಿಯ ಮ್ಯಾನೇಜ್ಮೆಂಟ್ ನಿರ್ಧರಿಸಿತು. ನನಗೆ ಮತ್ತು ನಮ್ಮ ಇಡೀ ತಂಡಕ್ಕೆ ಫ್ಯಾಕ್ಟರಿಯ ಪರವಾಗಿ ಒಂದು ಶರ್ಟ್ ಉಡುಗೊರೆ ಕೊಡಲು ಸ್ಥಳೀಯ ಕಂಪನಿಯವರು ನಿರ್ಧರಿಸಿದರು. ವಿಶೇಷವೆಂದರೆ ಆದು ಫ್ಯಾಕ್ಟರಿಯಲ್ಲಿ ತಯಾರಾದ ಶರ್ಟ್ ಅಲ್ಲ, ನಮ್ಮ ಅಳತೆಗೆ ವಿಶೇಷವಾಗಿ ತಯಾರಿಸಿದ್ದು. ಇದಕ್ಕಾಗಿ ಒಬ್ಬ ಟೇಲರ್ ಬಂದು ನಮ್ಮ ಅಳತೆ ತೆಗೆದುಕೊಂಡ. ಬಟ್ಟೆಯ ವಿನ್ಯಾಸವನ್ನು ಅವರೇ ನಿರ್ಧರಿಸಿ ಎಲ್ಲರಿಗೂ ಒಂದೆರಡು ವಾರದಲ್ಲಿ ಉಡುಗೊರೆಗಳನ್ನು ವಿತರಿಸಿದರು.  ನನಗೆ ತೆಳು ನೀಲಿ ಬಣ್ಣದ ಶರ್ಟ್ ಕೊಟ್ಟರು. ಈ ಶರ್ಟ್ ನನಗೆ ಬಹಳ ಒಪ್ಪುತ್ತದೆ ಎಂದು ರಾಫವನ್ ಹೊಗಳಿದರು. ನಾನು ಹೊರಡುತ್ತೇನೆಂದು ತಿಳಿದ ಜೀನ್ ನನಗೆ ತಾವು ಮಾಡಿದ ಪುಟ್ಟ ಸ್ಟೇನ್ ಗ್ಲಾಸ್ ಹಕ್ಕಿಯನ್ನೂ ಮತ್ತು  ಒಂದು ಕಪ್ಪುಬಣ್ಣದ ಸ್ಯಾಟಿನಿ ಟೈ ಕೊಟ್ಟರು. ನನ್ನನ್ನು ತಮ್ಮ ಎಂದಿನ.ಶೈಲಿಯಲ್ಲಿ ಬಿಗಿಯಾಗಿ ಅಪ್ಪಿಕೊಂಡು ""ನಿನ್ನ ಈ ಅಮ್ಮನನ್ನು ಮರೆತು ಬಿಡಬೇಡ" ಎಂದರು. ತಮ್ಮನ್ನು ಅವರು ನಮ್ಮ ಅದರ್ ಮದರ್ ಎಂದೇ ಹೇಳಿಕೊಳ್ಳುತ್ತಿದ್ದರು.  ನಾನು ಫ್ಲಾರಿಡಾಗೆ ಹೊರಟೆ. ಮತ್ತೊಮ್ಮೆ ಹೆಲಿಕಾಪ್ಟರಿನಲ್ಲಿ ಕೂತು ಜಾರ್ಜ...

 ಮೌಂಟನ್ ಹೋಮಿನಲ್ಲಿ ಸಮಯ ಕಳೆಯುವುದು ಕಷ್ಟವಾಗಿತ್ತು.  ಶನಿವಾರ ಮತ್ತು ಭಾನುವಾರ ಎಲ್ಲೂ ಹೋಗುವ ಕಾರ್ಯಕ್ರಮವಿಲ್ಲದಿದ್ದರೆ ಮನೆಯಲ್ಲಿ ನಮಗಿದ್ದ ಒಂದೇ ಮನರಂಜನೆ ಎಂದರೆ ಟಿವಿ. ನಾನು ಪತ್ರಗಳನ್ನು ಬರೆಯುವ ಹವ್ಯಾಸ ಇಟ್ಟುಕೊಂಡಿದ್ದೆ.  ಸ್ಥಳೀಯ ಲೈಬ್ರರಿಯಲ್ಲಿ ಪುಸ್ತಕ  ಎರವಲು ಪಡೆಯಲು ಶನಿವಾರ ಹೋಗುತ್ತಿದ್ದೆವು.  ನಮ್ಮ ಆಫೀಸ್ ಸಹೋದ್ಯೋಗಿಗಳು ಗುರುವಾರದಿಂದಲೇ ವೀಕೆಂಡ್ ಕಾರ್ಯಕ್ರಮವನ್ನು ಕುರಿತು ಮಾತಾಡಿಕೊಳ್ಳುತ್ತಿದ್ದರು. ಸೋಮವಾರ ತಮ್ಮ ವೀಕೆಂಡ್ ಹೇಗಿತ್ತು ಎಂದು ವಿಚಾರ ವಿನಿಮಯ ಮಾಡಿಕೊಳ್ಳುತ್ತಿದ್ದರು.   ಆಗ ಅಮೆರಿಕನ್ ಟಿವಿ ಈಗಿನಂತೆ ಕೆಟ್ಟುಹೋಗಿರಲಿಲ್ಲ. ಒಳ್ಳೆಯ ಕಾರ್ಯಕ್ರಮಗಳು ಬರುತ್ತಿದ್ದವು. ಎನ್.ಬಿ.ಸಿ, ಎ.ಬಿ.ಸಿ., ಪಿ.ಬಿ.ಎಸ್. ಇವು ಒಳ್ಳೆಯ ಕಾರ್ಯಕ್ರಮಗಳನ್ನು ತಯಾರಿಸುತ್ತಿದ್ದವು. ಸಿಕ್ಸ್ಟಿ ಮಿನಿಟ್ಸ್, ವಿಷನ್ 20/20 ಮುಂತಾದ ಕಾರ್ಯಕ್ರಮಗಳು ಬಹಳ ಚೆನ್ನಾಗಿದ್ದವು.  ಜಾನಿ ಕಾರ್ಸನ್ ಶೋ ಆಗ ಹೊಸತು. ಸ್ಯಾಟರ್ಡೆ ನೈಟ್ ಲೈವ್ ಕೂಡಾ. ಮರ್ಡರ್ ಶೀ ರೋಟ್, ನೈಟ್ ರೈಡರ್, ಸ್ಟಾರ್ ಟ್ರೆಕ್, ಮಿಷನ್ ಇಂಪಾಸಿಬಲ್ ಮುಂತಾದ ಕಾರ್ಯಕ್ರಮಗಳು ಆಗ ಎಲ್ಲರ ಕುತೂಹಲವನ್ನು ಕೆರಳಿಸುತ್ತಿದ್ದವು. ನೈಟ್ ರೈಡರ್ ಅಪಾರ ಜನಪ್ರಿಯತೆ ಪಡೆದುಕೊಂಡಿತ್ತು. ಅದರಲ್ಲಿ ಕಿಟ್ ಎಂಬ ಒಂದು ಕಾರಿನ ಪಾತ್ರವಿದೆ. ಇದು ಅತ್ಯುನ್ನತ ತಂತ್ರಜ್ಞಾನ ಹೊಂದಿದ ಅದ್ಭುತ ಕಾರ್. ಇದೇ ರೀತಿ ಮಿಷನ್ ಇಂಪಾಸಿಬಲ...

 ಕೋಬಾಲ್ ಪ್ರೋಗ್ರಾಮಿಂಗ್ ನಾನು ಕಲಿತ ಮೊದಲ ಕಂಪ್ಯೂಟರ್ ಕೌಶಲ್ಯ. ಆಗ ಫೋರ್ಟ್ರಾನ್, ಬೇಸಿಕ್ ಮತ್ತು ಕೋಬಾಲ್ ಎಂಬ ಮೂರು ಪ್ರೋಗ್ರಾಮಿಂಗ್ ಭಾಷೆಗಳದ್ದೇ ರಾಜ್ಯ. ವೈಜ್ಞಾನಿಕ ಸಮಸ್ಯೆಗಳಿಗೆ ಫೋರ್ಟ್ರಾನ್, ಗೇಮಿಂಗ್ ಮುಂತಾದ ಹವ್ಯಾಸಗಳಿಗೆ ಬೇಸಿಕ್, ಮತ್ತು ಬಿಸಿನೆಸ್ ಸಂಬಂಧಿಸಿದ ಸಮಸ್ಯೆಗಳಿಗೆ ಕೋಬಾಲ್. ಕೋಬಾಲ್ ಭಾಷೆಯನ್ನು ಅಭಿವೃದ್ಧಿ ಪಡಿಸಿದ ಶ್ರೇಯಸ್ಸು ಗ್ರೇಸ್ ಹಾಪರ್ ಎಂಬ ಮಹಿಳೆಗೆ ಸಲ್ಲುತ್ತದೆ. ಆಕೆ ಅಮೆರಿಕದ ರಕ್ಷಣಾ ವಿಭಾಗದಲ್ಲಿ ಕೆಲಸ ಮಾಡುವಾಗ ಫ್ಲೋಮ್ಯಾಟಿಕ್ ಎಂಬ ಪ್ರೋಗ್ರಾಮಿಂಗ್ ಭಾಷೆಯನ್ನು ಅಭಿವೃದ್ಧಿ ಪಡಿಸಿದರಂತೆ. ಅದು ಕೋಬಾಲ್ ಭಾಷೆಗೆ ಪ್ರೇರಣೆ. ಪ್ರೋಗ್ರಾಮಿಂಗ್ ಕಲಿಯಲು ಇದು ಖಂಡಿತಾ ಸೂಕ್ತ ಭಾಷೆಯಲ್ಲ. ಆದರೆ ನಮಗೆ ಇದನ್ನು ಕಲಿಯದೆ ಬೇರೆ ದಾರಿಯಿರಲಿಲ್ಲ.  ಆಗ ನಾವು ಕೆಲಸ ಮಾಡುತ್ತಿದ್ದುದು ಒಂದು ಮಿನಿ ಕಂಪ್ಯೂಟರ್ ಮೇಲೆ. ಡೇಟಾ ಜೆನೆರಲ್ ಎಂಬ ಕಂಪನಿ ಅಭಿವೃದ್ಧಿ ಪಡಿಸಿದ ಎಂವಿ 10000 ಎಂಬ ಕಂಪ್ಯೂಟರ್. ಆಗ ಕಂಪ್ಯೂಟರ್ ಕ್ಷೇತ್ರದಲ್ಲಿ ಐಬಿಎಂ ಮುಂಚೂಣಿಯಲ್ಲಿತ್ತು. ಡಿಜಿಟಲ್ ಎಕ್ವಿಪ್ಮೆಂಟ್ ಕಾರ್ಪೊರೇಷನ್ ಎಂಬ ಕಂಪನಿ ಐಬಿಎಂಗೆ ಪ್ರತಿಸ್ಪರ್ಧಿ. ಈ ಸಂದರ್ಭದಲ್ಲಿ ಡೇಟಾ ಜೆನೆರಲ್ ಎಂಬ ಕಂಪನಿ ಈ ಕ್ಷೇತ್ರವನ್ನು ಪ್ರವೇಶಿಸಿ ಸಾಕಷ್ಟು ಕ್ರಾಂತಿಕಾರಕ ಸಾಧನೆಗಳನ್ನು ಮಾಡಿತು. ದ ಸೋಲ್ ಆಫ್ ಎ ನ್ಯೂ ಮೆಷೀನ್ ಎಂಬ ಪುಸ್ತಕದಲ್ಲಿ ಡೇಟಾ ಜೆನೆರಲ್ ಕಂಪನಿಯಲ್ಲಿ ಕಂಪ್ಯೂಟರ್ ಅಭಿವೃದ್ಧಿ ಪಡಿಸಿದ ಕಥೆ ಇದೆ. ಆಗ...

 ನಾವು ಭಾರತೀಯರು ಮೌಂಟನ್ ಹೋಮಿನಂಥ ಗ್ರಾಮಕ್ಕೆ ಹೋದಾಗ ಊಟ ತಿಂಡಿಗೆ ಸಹಜವಾಗಿ ಕಷ್ಟ ಪಡಲೇಬೇಕು. ಅದರಲ್ಲೂ ಸಸ್ಯಾಹಾರಿಗಳಾದರೆ ಅವರಿಗೆ ಇನ್ನೂ ಹೆಚ್ಚು ತೊಂದರೆ. ಹೆಲಿಕಾಪ್ಟರಿನಲ್ಲಿ ಬಂದಿಳಿದ ನಮ್ಮನ್ನು ಎದುರುಗೊಳ್ಳಲು ರಾನ್ ಎಂಬ ಅಧಿಕಾರಿ ಇನ್ನೂ ಕೆಲವರು ಸಹೋದ್ಯೋಗಿಗಳೊಂದಿಗೆ ಬಂದಿದ್ದ.  ಅವರು ತಮ್ಮ ಕಾರುಗಳಲ್ಲಿ ನಮ್ಮನ್ನು ಹಿಲ್ ಕ್ರೆಸ್ಟ್ ಗಾರ್ಡನ್ ಅಪಾರ್ಟ್ಮೆಂಟ್ಸ್ ಎಂಬಲ್ಲಿಗೆ ಕರೆದೊಯ್ದರು. ಅಲ್ಲಿ ಕೆಳಗಿನ ಅಪಾರ್ಟ್ಮೆಂಟಿನಲ್ಲಿ ನಮ್ಮ ಡೈರೆಕ್ಟರ್ ಮತ್ತು ಮೇಲಿನ ಅಪಾರ್ಟ್ಮೆಂಟಿನಲ್ಲಿ ನಾವು ಇಂಜಿನಿಯರ್ಸ್ ತಂಗುವುದು ಎಂಬ ನಿರ್ಧಾರವಾಗಿತ್ತು. ಅಪಾರ್ಟ್ಮೆಂಟ್ ಹೊಸದು. ಬಹುಶಃ ನಾವೇ ಅದರ ಮೊದಲ ವಾಸಿಗಳು. ಮೊದಲೇ ಫರ್ನಿಚರ್ ಎಲ್ಲವನ್ನೂ ಸಜ್ಜುಗೊಳಿಸಿದ್ದರು.  ಫ್ರಿಜ್ ಕೂಡಾ ಇತ್ತು. ಆಗ ಬೆಂಗಳೂರಿನಲ್ಲಿ ಫ್ರಿಜ್ ಬಳಸುವ ರೂಢಿಯೇ ಇರಲಿಲ್ಲ. ಹೀಗಾಗಿ ನಮಗೆ ಇದು ಹೊಸ ಅನುಭವ.  ಅದೇ ಸಂಜೆ ನಮ್ಮನ್ನು ಊಟಕ್ಕೆ ಕರೆದೊಯ್ಯಲು ರಾನ್ ಮತ್ತಿತರ ಅಧಿಕಾರಿಗಳು ಬಂದರು. ಹಾಲಿಡೇ ಇನ್ ರೆಸ್ಟೋರಾಂದಲ್ಲಿ ನಮಗೆ ಆತಿಥ್ಯವಿತ್ತು. ಎಲ್ಲರೂ ತಮ್ಮ ಹೆಂಡತಿಯರನ್ನೂ ಕರೆದುಕೊಂಡು ಬಂದಿದ್ದರು. ಹೀಗಾಗಿ ನಮಗಾಗಿ ದೊಡ್ಡ ಮೇಜುಗಳನ್ನು ಜೋಡಿಸಿ ಸುತ್ತಲೂ ಕೂಡುವ  ವ್ಯವಸ್ಥೆ ಇತ್ತು. ವೇಟ್ರೆಸ್ ನಮಗೆ ಕುಡಿಯಲು ಏನು ಬೇಕೆಂದು ಕೇಳಿದಳು. ನನಗೆ ಆಲ್ಲಿಯವರೆಗೂ ಒಗ್ಗಿದ ಏಕಮಾತ್ರ ಪೇಯವೆಂದರೆ ಆರೆಂಜ್ ಜೂಸ್.  ಬೇರೆಯವರು ...

  ಸೂರ್ಯನು ಸೇರಿ ಪಶ್ಚಿಮ ದಡ ,  ಮುಳುಗಿದನು ಸಂಧ್ಯೆಯ ಮುಸುಕನ್ನು ತೊಟ್ಟಿತು ಧಾತ್ರಿ ನೂರು ಸಂಜೆಗಳಂತೆಯೇ ಆ ಸಂಜೆಯೂ ಇತ್ತು ಮತ್ತೆ ಎದ್ದೇಳುವಾಗ ನನಗೇಕೆ ಅನ್ನಿಸಿತ್ತು ದಿನದಲ್ಲಿ ನಡೆವುದು ಏನಾದರೂ ಹೊಸತು? ಅಗೋ ಕಳೆಯಿತು ದಿವಸ, ಅಗೋ ರಾತ್ರಿ  ಮೆಲ್ಲಮೆಲ್ಲನೆ ಹೊರಬಂದವು ತಾರಗೆ ಮಿನುಗತೊಡಗಿತು ಬಿಚ್ಚಿಟ್ಟ ಬಾನ್ ಛತ್ರಿ ನೂರು ಇರುಳುಗಳಂತೆ ಆ ಇರುಳೂ ಇತ್ತು ಮತ್ತೆ ಸಂಜೆಯಾದಾಗ ಹೀಗೇಕೆ ಅನ್ನಿಸಿತ್ತು ತರುವುದೇನಾದರೂ ನಿಶೆ ಹೊಸದನ್ನು ಹೊತ್ತು? ಅಗೋ ಕಳೆಯಿತು ದಿವಸ, ಅಗೋ ರಾತ್ರಿ ಹಕ್ಕಿಗಳು ಉಲಿದವು, ಬಿರಿದವು ಮೊಗ್ಗು ಮತ್ತೆ ಬೆಸೆಯಿತು ಕಮಲ ಸೂರ್ಯನ ಮೈತ್ರಿ ಎಂದಿನಂತೆಯೇ ಇತ್ತು ಆ ದಿನದ ಬೆಳಗು ಮತ್ತೇಕೆ ನಿದ್ರೆಯಲ್ಲಿ ಉಲಿಯುತ್ತಿತ್ತು ನನ್ನೊಳಗು ನಸುಕು ನಾವೀನ್ಯವನ್ನು ತಂದೀತು ಎಂದು? ಅಗೋ ಕಳೆಯಿತು ದಿವಸ,  ಅಗೋ ರಾತ್ರಿ ಮೂಲ: ಹರಿವಂಶ ರಾಯ್ ಬಚ್ಚನ್ ಕನ್ನಡಕ್ಕೆ: ಸಿ. ಪಿ. ರವಿಕುಮಾರ್

ಬಂದದ್ದೇನು ನನ್ನ ಪಾಲಿಗೆ? ಎಲ್ಲಿ ಮಾಡಬೇಕಿತ್ತೋ ಸೀಯಾಳದಿಂದ ನೀರಾವರಿ ಅಲ್ಲಿ ಉ ಪ್ಪುನೀರಿನ ಹೊರತು ಬೇರೇನಿಲ್ಲ ರಹದಾರಿ ಏನೂ ಬೆಳೆಯದ ಜೀವನಹೊಲದಿಂದೇಕೆ ವಿಧಿ ತುಂಬಿತು ಈ ಬಾಳ ಜೋಳಿಗೆ? ಬಂದದ್ದೇನೆನ್ನ ಪಾಲಿಗೆ? ಕಣ್ಣೀರಿನಿಂದ ತೊಯ್ಯಿಸಿದರೂ ಹೊಲದಲ್ಲಿ ಬೆಳೆಯದಲ್ಲ ಫಲ ನೀಡುವ ಬಳ್ಳಿ ಸೃಷ್ಟಿಯ ಯಾವ ಗೂಢಾರ್ಥ ಅಡಗಿಹುದು ವ್ಯರ್ಥ ಪುನಃ ಪ್ರಯತ್ನದೊಳಗೆ? ಬಂದದ್ದೇನೇನ್ನ ಪಾಲಿಗೆ? ಮುರಿದುಹೋಗುತ್ತವೆ ಮಧುಮಾಸಗಳು ಏಕೆ ಕಾಲಿಡುವ ಮೊದಲೇ ಮಧುವನದ ಒಳಗೆ? ನಾಳೆಯ  ಪೂರ್ವ ಸಿದ್ಧತೆಯಲ್ಲೆ ಕರಗಿಹೋಗುತ್ತಿರುವ ಬಾಳಿಗೆ ಬಂದದ್ದೇನೆನ್ನ ಪಾಲಿಗೆ? ಮೂಲ: ಹರಿವಂಶ ರಾಯ್ ಬಚ್ಚನ್ ಅನುವಾದ: ಸಿ. ಪಿ. ರವಿಕುಮಾರ್

 ಕೆಲವರ ಮುಖಕ್ಕಿಂತಲೂ ಅವರ ಬೆನ್ನಲ್ಲೇ ಹೆಚ್ಚು ಭಾವನೆಗಳಿವೆ ಎಂದು ಒಬ್ಬರು ಭಾಷಣದಲ್ಲಿ ಹೇಳಿದರು ಎಂದು ಸೋಷಿಯಲ್ ಮೀಡಿಯಾ ವರದಿ ಓದಿದೆ. ಮುಖದಲ್ಲಿರುವ ಭಾವನೆಗಳನ್ನು ವ್ಯಕ್ತ ಪಡಿಸಲು ಜುಕರ್ ಬರ್ಗ್ ಮಹಾಶಯ ಫೇಸ್ ಬುಕ್ ಪ್ರಾರಂಭಿಸಿದ ಹಾಗೆ ಈಗ ಬೆನ್ನಿನ ಭಾವನೆಗಳನ್ನು ವ್ಯಕ್ತಗೊಳಿಸಲು ಬ್ಯಾಕ್ ಬುಕ್  ಒಂದು ಪ್ರಾರಂಭವಾಗುವುದೇ ಬಾಕಿ.  ಬ್ಯಾಕ್ ಅಪ್ ಅನ್ನುವುದನ್ನ ತಿರುಚಿ ಬ್ಯಾಕ್ ಆಪ್ ಎಂಬ ಹೆಸರನ್ನು ನಾನು ಈಗಲೇ ಪೇಟೆಂಟ್ ಮಾಡೋಣ ಎಂದು ಯೋಚಿಸುತ್ತಿದ್ದೇನೆ.  ಹೇಗೆ  ವಾಟ್ಸಾಪ್ ನಮ್ಮೆಲ್ಲರನ್ನೂ ವಾಟ್ಸಾಪಿ ಜೀರ್ಣೋಭವ ಎಂದು ಸ್ವಾಹಾ ಮಾಡಿ ನಮ್ಮ ಸಮಾಜದ ಬೆನ್ನೆಲುಬಾಗಿರುವಂತೆ  ನಟಿಸುತ್ತಿದೆಯೋ ಬ್ಯಾಕಾಪ್ ಅದಕ್ಕೆ ತಕ್ಕ ಟಾಕ್ ಬ್ಯಾಕ್ ಅಥವಾ ಪ್ರತ್ಯುತ್ತರ ನೀಡಬಲ್ಲದು ಎಂದು ನಾನು ನಂಬಿದ್ದೇನೆ. ಬೆನ್ನಿಗೆ ಹುಟ್ಟಿದವರು ಎಂದರೆ ತಮ್ಮ ತಂಗಿಯರು.  ಫೇಸ್ ಬುಕ್ ಬೆನ್ನಿಗೆ ಹುಟ್ಟಿದ ವಾಟ್ಸಾಪ್ ತನ್ನ ಅಣ್ಣನನ್ನೇ ಮೀರಿಸುವಂತೆ ಬೆಳೆಯತೊಡಗಿ ಜುಕರ್ ಬರ್ಗ್ ಕಂಗಾಲಾಗಿ ತಮ್ಮನಿಗೆ ಒಂದಷ್ಟು ಬಿಳಿಯನ್ನ ಹಾಕಿ ತನ್ನ ಬ್ಯಾಕನ್ನು ರಕ್ಷಿಸಿಕೊಂಡಿದ್ದು ನಿಮಗೆ ತಿಳಿಯದ ವಿಷಯವೇನಲ್ಲ.  ವಾಟ್ಸಾಪ್ ಸೃಷ್ಟಿಸಿದ ಮಹಾನುಭಾವಂದಿರೇ ಬ್ಯಾಕಾಪ್ ಆಪನ್ನು ಸೃಷ್ಟಿಸಲು "ವೀ  ವಿಲ್ ಬೀ ರೈಟ್ ಬ್ಯಾಕ್" ಎನ್ನುತ್ತಾ ಜುಕರ್ ಬರ್ಗ್ ಮಹಾಶಯನಿಗೆ ಬೆನ್ನು ತೋರಿಸಿ ಬಿಟ್ಟರೆ ಹೇಗೆ ಎಂದು ಕಲ್ಪಿಸಿಕೊಳ್ಳಿ!...

 ಭಯ ಮೂಲ: ಖಲೀಲ್ ಗಿಬ್ರಾನ್ ಕನ್ನಡ ಅನುವಾದ: ಸಿ. ಪಿ. ರವಿಕುಮಾರ್ ಭಯದಿಂದ ಕಂಪಿಸುವುದಂತೆ ನದಿ ಸಮುದ್ರವನ್ನು ಪ್ರವೇಶಿಸುವ ಮೊದಲು. ತಾನು ಸಾಗಿ ಬಂದ ಹಾದಿಯತ್ತ ಹಾಯಿಸುತ್ತದೆ ಹೊರಳುನೋಟ ಪರ್ವತ ಶಿಖರಗಳಿಂದ ಧುಮುಕಿ ಸುತ್ತುತ್ತ ಕಾಡುಮೇಡುಗಳಲ್ಲಿ ಅದೆಷ್ಟು ಹಳ್ಳಿಗಳನ್ನು ದಾಟಿ  ಈಗ ನೋಡುತ್ತದೆ ತನ್ನೆದುರು ಆದಿ ಅಂತ್ಯವೇ ಗೋಚರಿಸದ ಸಿಂಧು ಪ್ರವೇಶಿಸಿದರೆ ಈ ಮಹಾಜಲಧಿಯನ್ನು ಅನಂತ ಕಾಲಕ್ಕೂ ಕಳೆದುಹೋಗುವ ಭೀತಿ ಆದರೆ ಬೇರಾವ ಮಾರ್ಗವೂ ಇಲ್ಲ ಹಾಕಲಾರದು ನದಿ ಹಿನ್ನಡೆ. ಹಿಂದಿರುಗಲಾರರು ಯಾರೂ. ಅಸ್ತಿತ್ವದಲ್ಲಿ ಹಿನ್ನಡೆ ಅಸಾಧ್ಯ. ನದಿಯು ಎದುರಿಸಲೇ ಬೇಕು ಸಾಗರವನ್ನು ಸೇರುವ ಅಪಾಯ: ಏಕೆಂದರೆ ಆಗಲೇ ಬಿಡುವುದು ಭಯ ಏಕೆಂದರೆ ಆಗಲೇ ನದಿಗೆ ಹೊಳೆಯುವುದು ಸಮುದ್ರದಲ್ಲಿ ತಾನು ಕಳೆದುಹೋಗಿಲ್ಲ ತಾನೇ ಸಮುದ್ರವಾಗಿರುವೆನೆಂಬ ತಿಳಿವು.

 ಮೌಂಟನ್ ಹೋಮ್ ಎಂಬ ಕುಗ್ರಾಮದಲ್ಲಿ ಇರಬೇಕಾಗಬಹುದು ಎಂದು ನಾನು ಎಂದೂ ಯೋಚಿಸಿರಲಿಲ್ಲ. ನ್ಯೂಯಾರ್ಕಿನಲ್ಲಿ ಒಂದು ವಾರ ಕಳೆದ ಮೇಲೆ ನಮ್ಮ ಪ್ರಾಜೆಕ್ಟ್ ಇದ್ದ ಮೌಂಟನ್ ಹೋಮ್ ಎಂಬ ಗ್ರಾಮಕ್ಕೆ ಕಂಪನಿಯು ಕಳಿಸಿತು. ಈ ಗ್ರಾಮ ಇರುವುದು ಅರ್ಕನ್ಸಾ(ಸ್) ಎಂಬ ರಾಜ್ಯದಲ್ಲಿ. ಇಂಟರ್ನೆಟ್ ಇಲ್ಲದ ಆ ದಿನಗಳಲ್ಲಿ ಈ ರಾಜ್ಯ ಎಲ್ಲಿದೆ ಮತ್ತು ಅಲ್ಲಿಯ ಜನಜೀವನದ ಬಗ್ಗೆ ತಿಳಿದುಕೊಳ್ಳುವ ಸಾಧನಗಳಿರಲಿಲ್ಲ. ಆಗ ಅಮೆರಿಕಾಗೆ ಹೋಗುತ್ತಿದ್ದವರು ಬಹಳ ಕಡಿಮೆ ಜನ. ನನ್ನ ನ್ಯಾಷನಲ್ ಕಾಲೇಜ್ ಟೀಚರ್ ಪದ್ಮಾವತಮ್ಮ ಅವರ ತಮ್ಮ ಅಮೆರಿಕಾದಲ್ಲಿದ್ದರು. ಅವರು ಭಾರತಕ್ಕೆ ಬಂದಿದ್ದರೆಂದು ತಿಳಿದು ಅವರನ್ನು ಭೇಟಿ ಮಾಡಿ ಅಲ್ಲಿಯ ಜೀವನ ಹೇಗೆ ಎಂದು ವಿಚಾರಿಸಿದೆ. ಅವರು ತಮಗೆ ತಿಳಿದ ಕೆಲವು ಸಲಹೆಗಳನ್ನು ಹೇಳಿದರು. ಇಂಥ ಸಲಹೆಗಳನ್ನು ಕೇಳುವುದು ಮತ್ತು ಅವುಗಳನ್ನು ನೀಡುವುದೂ ಅಷ್ಟು ಉಪಯುಕ್ತವಲ್ಲ ಎಂದು ನನಗೆ ನಂತರ ತಿಳಿಯಿತು. ಅಮೆರಿಕಾ ಬಹಳ ದೊಡ್ಡ ದೇಶ. ಅಲ್ಲಿ ಒಂದು ರಾಜ್ಯ ಇದ್ದಂತೆ ಇನ್ನೊಂದಿಲ್ಲ. ನ್ಯೂಯಾರ್ಕ್ ನಗರದಲ್ಲಿರುವವರನ್ನು ಅರ್ಕನ್ಸಾ ಬಗ್ಗೆ ಕೇಳಿದರೆ ಬಾಂಬೆಯಲ್ಲಿರುವವರನ್ನು ಬೊಮ್ಮನಹಳ್ಳಿಯ ಬಗ್ಗೆ ಕೇಳಿ ಸಲಹೆ ಪಡೆದಷ್ಟೇ ಉಪಯುಕ್ತ.  ನ್ಯೂಯಾರ್ಕ್ ನಗರದಿಂದ ಅಟ್ಲಾಂಟಾಗೆ (ಜಾರ್ಜಿಯಾ) ಹೋಗಿ ಅಲ್ಲಿಂದ ಚಾರ್ಟರ್ಡ್ ಹೆಲಿಕಾಪ್ಟರಿನಲ್ಲಿ ನಾವು ಮೌಂಟನ್ ಹೋಮಿಗೆ ಹೋದೆವು. ಇವೆಲ್ಲ ನಮಗೆ ಹೊಸತು.  ಹೆಲಿಕಾಪ್ಟರಿನ ಚಾಲಕ ಏನೋ ಮಾತಾಡುತ್ತಿದ...