ಮಂದಹಾಸಗಳ ಸಂತೆ

ಮೂಲ ಹಿಂದಿ: ಗೋಪಾಲ್ ದಾಸ್ "ನೀರಜ್"
ಕನ್ನಡಕ್ಕೆ : ಸಿ. ಪಿ. ರವಿಕುಮಾರ್ 


ಪ್ರೀತಿಸುವುದೇ ಆದರೆ, ಪಥಿಕ, ಪ್ರೀತಿಸು ಯೋಚಿಸಿ, ತಿಳಿದು 
ಬೆಳ್ಳಿಯ ನಾಡಿದು, ಇಲ್ಲಿ ದೊರೆಗಳೇ ಸುಳ್ಳು ಹೇಳಬಹುದು 

ನಿನ್ನ ನೋವು ನಿಟ್ಟುಸಿರು ಕೇಳಲೂ ಯಾರಿಗಿಲ್ಲಿ  ಪುರುಸೊತ್ತು?
ಬೀಸಿ ನಿನಗೆ ತಂಗಾಳಿ ಸಂತೈಸೆ ಬರುವರಾರೆಲ್ಲವನು ಬಿಟ್ಟು?

ಮರುಭೂಮಿಯಲ್ಲಿ ಬಿಳಿಮೋಡವಾಗಿ ಹುಡುಕುತಿರುವೆ ಯಾರನ್ನು?
ನಿನ್ನ ಕಡೆಗೆ ವ್ಯಾಕುಲತೆಯಿಂದ ನೋಡುವುದು ಯಾರ ಕಣ್ಣು?

ಇಲ್ಲಿ ನಡೆದಿಹುದು ಹೂಗಳ ಮೇಳ,  ಮಂದಹಾಸಗಳ ಸಂತೆ 
ಒಣಗಿಹೋದ ಕಂಬನಿಯ ಮಾಲೆ ಕೊಳ್ಳುವವರು ಯಾರಂತೆ?

ಪ್ರೀತಿಸುವುದೇ ಆದರೆ, ಪಥಿಕ, ಪ್ರೀತಿಸು ಯೋಚಿಸಿ, ತಿಳಿದು!