ಹೆದರಬೇಕೇ ಕೊರೊನಾವೈರಸಕ್ಕೆ (ಗಜಲ್)

ಸಿ.ಪಿ. ರವಿಕುಮಾರ್

ಯೋಚಿಸುತ್ತೇನೆ, ಹೆದರಬೇಕೇ  ಕೊರೊನಾ ವೈರಸಕ್ಕೆ
ಹೆದರಬೇಕಾಗಿರುವುದು ಕಾರಣವಿಲ್ಲದ ವಿರಸಕ್ಕೆ

ಬಂದೀತು ಇಂದಲ್ಲ ನಾಳೆ ಒಂದು ಆಂಟಿಬಯಾಟಿಕ್
ಯಾವ ಮದ್ದಿದೆ ಹೇಳಿ ಕಾರಣವಿಲ್ಲದ ವಿರಸಕ್ಕೆ

ಯಾರು ಹರಡಿ ಹಂಚಬೇಕೋ ಪ್ರೀತಿಯ ರಸವನ್ನು
ಧರ್ಮಗುರುಗಳು ಬೆರೆಸುತ್ತಾರೆ ಆಸಿಡ್ ರಸಕ್ಕೆ

ಹೆದರಿಸುತ್ತೀ ನೀನು ಹಣದ ಉಬ್ಬರ ನಿರುದ್ಯೋಗಗಳ ಬಗ್ಗೆ
ಒಳಗೆ ಟೊಳ್ಳಾದ ಬಳ್ಳಿಯೇ ಬೀಳುವುದು ಗಾಳಿಯ ರಭಸಕ್ಕೆ

ಹೆದರುತ್ತೀ ನೀನು ಭೂತಪಿಶಾಚಿಗಳಿಗೆ, ದುಷ್ಟಗ್ರಹಗಳಿಗೆ
ಒಪ್ಪಿಸಿಕೊಳ್ಳುವೆ ನಿನ್ನನ್ನೇ ಒಡೆದು ಆಳುವ ಅಂಕುಶಕ್ಕೆ

ಎಷ್ಟು ಸುಲಭ ದ್ವೇಷಿಸುವುದು ನಿನ್ನವರನ್ನು ನೀನು
ಹೆದರುತ್ತೇನೆ ನಾನು ಕಾರಣವಿಲ್ಲದ ಈ ದ್ವೇಷಕ್ಕೆ

#ಗಜಲ್