ಯಾವೊಬ್ಬ ಮಾನವನೂ ದ್ವೀಪವಲ್ಲ

ಮೂಲ ಇಂಗ್ಲಿಷ್ ಕವಿತೆ - ಜಾನ್ ಡನ್ 
ಅನುವಾದ - ಸಿ. ಪಿ. ರವಿಕುಮಾರ್ 


ಯಾವೊಬ್ಬ ಮಾನವನೂ ದ್ವೀಪವಲ್ಲ 
ಯಾರೊಬ್ಬನೂ ತಾನೇ ಪೂರ್ಣನಾಗ.   
ಪ್ರತಿಯೊಂದೂ ಭೂಖಂಡದ ಅಂಶ,
ಮೂಲವೊಂದರ ಪುಟ್ಟ ಭಾಗ. 

ಕಿನಾರೆಯಿಂದ ಒಂದೇ ಒಂದು ಭೂಮಿಯ ಚೂರು 
ಕೊಚ್ಚಿ ಕೊಂಡೊಯ್ದರೆ  ಕಡಲು 
ಉಂಟಾಗುವುದು ಅಷ್ಟೇ ಚ್ಯುತಿ ಮೂಲಭೂಖಂಡಕ್ಕೆ 
ಕಳೆದುಕೊಂಡಂತೆ ಇಡೀ ಭೂಶಿರವನ್ನು ಒಡಲು;
ಕಳೆದು ಹೋದರೆ ಹೇಗಿದ್ದೀತು  
ನಿನ್ನ ಗೆಳೆಯನಿಗೋ ನಿನಗೋ  ಸೇರಿದ ಜಹಗೀರು. 

ಪ್ರತಿಯೊಬ್ಬ ಮಾನವನ ಸಾವೂ 
ಕುಂದಿಸುತ್ತದೆ ನನ್ನನ್ನು 
ಏಕೆಂದರೆ  ನಾನು ಮಾನವತೆಯ ಅಂಗ.  
ಪ್ರಶ್ನಿಸದಿರು ಯಾರಿಗಾಗಿ ಬಾಜಿಸುತ್ತಿದೆ ಗಂಟೆ ಎಂದು! 
ಬಾಜಿಸುತ್ತಿದೆ ನಿನಗಾಗಿ ಮೃದಂಗ.