ಒಂದು ಡಜನ್ ಲಿಮರಿಕ್ (ಹಾಸ್ಯ)

ಖೇಚರ 
~~~~~ 
ಆಕಾಶದಲ್ಲಿ ಚಲಿಸುವುದೇ "ಖೇಚರ"
ಅರ್ಥಾತ್ ಹಕ್ಕಿ ಎಂದ ಕನ್ನಡ ಟೀಚರ
ಮಾತು ಕೇಳಿ ಯೋಚಿಸಿದ ಭಾನು
ವಾಟ್ ಅಬೌಟ್ ಪ್ಲೇನು ವಾಟ್ ಅಬೌಟ್ ಡ್ರೋನು
ಹೀಗೆ ಕನ್ಫ್ಯೂಸ್ ಆಗೋದೇ ಅವನ ನೇಚರ


ಮಾರೀಚ 
~~~~~ ~~ 
ಬ್ರದರ್ಸ್ ಮಾರೀಚ ಮತ್ತು ಸುಬಾಹು
ರಾಮನ ಕೈಯಲ್ಲಿ ಅಪ್ಪಿದರು ಸಾವು
ಇನ್ನಿಬ್ಬರು ಇದ್ದರಲ್ಲ ಏನಾದರೋ ಅವರು
ಗಣಿತದ ಮೇಷ್ಟ್ರು ಹೇಳ್ತಿದ್ರು ಹೆಸರು
ಬ್ರದರ್ಸ್ ಸಮಬಾಹು ಮತ್ತು ವಿಷಮಬಾಹು

ದೀರ್ಘ
~~~~~ 
ಧೂಮ್ರಪಾನದಿಂದ ಆರೋಗ್ಯಹಾನಿ
ಎಂದು ನುಡಿದನು ಒಬ್ಬ ದೊಡ್ಡ ವಿಜ್ಞಾನಿ
"ಇನ್ನುಮೇಲೆ ಎಲ್ಲರೂ ಸಿಗರೇಟ್ ಬೀಡಿ"
ದೊಡ್ಡಕ್ಷರದಲ್ಲಿ ಟೈಪಿಂಗ್ ದೋಷ ನೋಡಿ
ಸುದೀರ್ಘವಾಗಿ ಎಳೆದುಕೊಂಡರು ಶ್ವಾಸ ನೆರೆದಿದ್ದ

ಮೇಕೆ 
~~~~ 
ಮೇ ಮೇ ಅಂತಿತ್ತು ಕನ್ನಡ ಮೇಕೆ
ಪ್ರಯತ್ನಿಸಿದೆ ಇಂಗ್ಲಿಷ್ ಕಲಿಸೋಕೆ
Me Me ಅಂತ ಬರೆದೆ ಪಕ್ ಪಕ್ಕ
ನಗೋಕೆ ಶುರು ಮಾಡ್ತು ಮೇಕೆ ಪಕ್ ಪಕಾ
ಚೆನ್ನಾಗಿದೆ ನಿನ್ನ MeMe ಅಂತ ಅನ್ಬೇಕಾ, ಪಕ್ಕಾ!

ದೇವಕಣ 
~~~~~~ 
ದೇವಕಣ ಕಂಡು ಹಿಡಿದ ಕೀರ್ತಿ
ಕುವೆಂಪು ಅವರಿಗೇ ಸಲ್ಲಬೇಕಿತ್ರೀ
ಓದಿದರೆ ಅವರ ಕವಿತೆ
ಹೇಳಿ ಸಿಕ್ಕದೇ ಇದ್ದೀತೇ
ಮಂತ್ರಕಣಾ ಶಕ್ತಿಕಣಾ ದೇವಕಣಾ ಆಲ್ ತ್ರೀ

ಜಲಚರ 
~~~~~~~ 
"ಜಲದಲ್ಲಿ ಚಲಿಸಿದ್ದು ಜಲಚರ"
ಎಂದು ವಿವರಿಸುವಾಗ ಕನ್ನಡ ಟೀಚರ
ಭಾನುವಿನ ಕಣ್ಮುಂದೆ ಮೂಡಿತೊಂದು ಚಿತ್ರ
ಹೊಟೆಲಿನಲ್ಲಿ ಅಂದು ತಾನು ಕಂಡ ವಿಚಿತ್ರ
ಟೀನಲ್ಲಿ ಓಡಾಡುತ್ತಿತ್ತು ತೇಲಾಡುತ್ತಿತ್ತೊಂದು ಟೀ-ಚರ


ಬಸ್ಯಾ 
~~~~ 
ಹಳ್ಳಿಯಲ್ಲೋದಿದನು ಶಾಲೆ ನಮ್ ಬಸ್ಯಾ
ಕರೆಯುತಿದ್ದನು ಏ ವೆಂಕ್ಯಾ ಏ ಕಿಟ್ಯಾ
ಬಂದು ಸೇರಿದಾಗ ಬೆಂಗಳೂರು ಐಟೀ ಕಂಪನಿ
ಬಸವರಾಜ್ ಆನಂದದಿಂದ ಸುರಿಸಿದನು ಕಂಬನಿ
ಇಲ್ಲೂ ಎಲ್ಲರೂ ತನ್ನಂತೆ ವಾಟ್ಯಾ ಎಸ್ಯಾ


ಸಾಂಭರ್ 
~~~~~~~~~ 
ಏನಿದು ಸಾಂಭರ್, ಮಸಾಲಾ ಡೋಸಾ
ಕನ್ನಡ ಭಾಷೆಗೆ ಮಾಡಿದ ಮೋಸ
ದೋಸೆ ಎನ್ನಿರಿ ಸಾಂಬಾರ್ ತಿನ್ನಿರಿ
ಮಸಾಲಾ ಯಾಕೆ, ಮಸಾಲೆ ಅನ್ನಿರಿ
ನಾವು ಕಲಿಯಲಿಲ್ಲವೇ ಪಲಾವ್ ಟೊಮೆಟೊ ಪೂರಿ, ಪೀಜಾ


ಕಾಣದ ಕಡಲಿಗೆ 
~~~~~~~~~~~~ 
"ಕಾಣದ ಕಡಲಿಗೆ ಹಂಬಲಿಸಿದೆ ಮನ" ...
ಕವಿ ಕರಾವಳಿಯವನೆಂದುಕೊಂಡರು ಜನ
ಹಲ್ಲಿದ್ದಾಗ ಇರದಿದ್ದ ಕಡಲೆ
ಸಿಕ್ಕಾಗ ಹಲ್ಲೇ ಇಲ್ಲದೆಲೆ
ಬರೆದ ಸಾಲೆಂದು ನನ್ನ ದಟ್ಟ ಅನುಮಾನ

ವಿಕ್ಕಿ 
~~~~ 
ವಿಕ್ರಮನು ವಿಕ್ಕಿ, ದೀಕ್ಷಿತನು ಡಿಕ್ಕಿ,
ಲಕ್ಷ್ಮಣನು ಲಕ್ಕಿ, ಅಕ್ಷಯನು ಅಕ್ಕಿ
ನಿಖಿಲನಾದನು ನಿಕ್ಕಿ
ಟೆಕ್ನಾಲಜಿಸ್ಟನು ಟೆಕ್ಕಿ
ಎಂಥ ಸಿಕಂದರನೂ ಜನರ ನಾಲಗೆಯಲ್ಲಿ ಸಿಕ್ಕಿ


ಸ್ಟಾರ್ ಮುಖಿ 
~~~~~~~~~~
ಕಮಲಮುಖಿ ಚಂದ್ರಮುಖಿ ಇತ್ಯಾದಿ ಪೂರ್ತಿ
ಟೈಪ್ ಮಾಡೋದ್ಯಾಕೆ ಅಂತ ಪ್ರೋಗ್ರಾಮರ್ ಕೀರ್ತಿ
ಟೈಪ್ ಮಾಡಿದನು ರೆಗ್ಯುಲರ್ ಎಕ್ಸ್ಪ್ರೆಷನ್ ಒಂದು
ಏನಿಲ್ಲ, ಸರಳ, ಡಾಟ್ ಸ್ಟಾರ್ ಮುಖಿ ಎಂದು
ಜ್ವಾಲಾಮುಖಿ ಅಗ್ನಿಮುಖಿಯರ ನೋಡಿ ಕಳಕೊಂಡನು ಸ್ಫೂರ್ತಿ


ಪಾಪಕರ್ಮ 
~~~~~~~~ 
ದೇವರೇ ನನ್ನ ಪಾಪಕರ್ಮಗಳನ್ನೆಲ್ಲ
ಹೊಟ್ಟೆಗೆ ಹಾಕಿಕೋ ಎಂದು ಪ್ರಾರ್ಥಿಸಿದೆನಲ್ಲ
ಬೆಳಗ್ಗೆ ಎದ್ದು ನೋಡಿದರೆ ಆಶ್ಚರ್ಯ
ಇಡೀ ಪ್ಯಾಕೆಟ್ ಪಾಪ್ ಕಾರ್ನ್ ಮಾಯ
ದೇವರಿಗೆ ಸರಿಯಾಗಿ ಕೇಳಿಸಿತಾ, ತಿಳೀಲಿಲ್ಲ

ಸಿ. ಪಿ. ರವಿಕುಮಾರ್