ಕರೋನಾ ಕರೋನಾ (ಚುಟುಕಗಳು)

 ಮಜಾ ಕರೋನಾ 
*****************

ನಾಳೆಯಿಂದ ಒಂದು ವಾರ ಜರ್ಬೇ ಜರ್ಬು
ರಜಾ ಬಂತೆಂದು ಕುಣಿದಾಡಿದನು ಸುಬ್ಬು
ಎದುರಾಯ್ತು ಸುಬ್ಬುವಿಗೆ ಮರುದಿವಸ ಪೇಚು
ಬಿಟ್ಟುಬಿಟ್ಟಂತಾಯ್ತು ಕೈಗೇ ಬಂದಿದ್ದ ಕ್ಯಾಚು

ಬಂದಾಗಿದ್ದವು ಎಲ್ಲಾ ಮಾಲು ಥೇಟರು ಪಬ್ಬು


ಥಿಯರಿ
******** 
ಕೊರೊನಾ ಹೇಗೆ ಬಂತು ರೀ
ಎಲ್ಲರಿಗೂ ಇದೆ ಅವರವರ ಥಿಯರಿ
ಒಬ್ಬರಿಗೆ ಕಾಣುತ್ತದೆ ಚೈನಾದ ಬಾವಲಿ
ಇನ್ನೊಬ್ಬರಿಗೆ ಬಯಲಾಜಿಕಲ್ ವೆಪನರಿ
ಮೋದಿ ಅಪ್ಪುಗೆಯಿಂದ ಎಂದು ಕೆಲವರಿಗೆ ಭಯ ರೀ

ಟೆರರಿಸ್ಟ್ 
*********ಡೋಂಟ್ ಪ್ಯಾನಿಕ್ ಎಂಬ ದೊಡ್ಡ ತಲೆಬರಹ
ಕೆಳಗೇಕಿದೆ ಕೊರೊನಾಸುರನ ಚಿತ್ರ ಉಹಹಹಾ?
ಕೈತೊಳೆಯಬೇಕೆಂಬ ಸರಳ ಸಂದೇಶ
ಎಲ್ಲೋ ಮರೆಯಾಗಿದೆ ಈ ಮುಗ್ಧ ಉದ್ದೇಶ
ಹೆದರಿಸುತ್ತಾರೇಕೆ ಜನರು ಈ ತರಹ!

ಸೀನಿ 
*****
ಸೀನಿ, ಸೀನು, ಸೀನಣ್ಣ ಎಲ್ಲರೂ
ಬದಲಾಯಿಸಿಕೊಳ್ಳಿ ಬೇಗನೇ ಹೆಸರು
ಯಾರಾದರೂ ಬಂಗಾಳಿ ಪ್ರಭೃತಿ
"ಸೀನಿ ದಾ" ಅಂದರೇನು ಗತಿ
ಜನರು ಎಷ್ಟು ಹೊತ್ತು ಹಿಡಿದಾರು ಉಸಿರು?


ಹೋಮ 
*********
ಎಲ್ಲೆಲ್ಲೂ ಕೇಳುತ್ತಿದೆ ಕರೋನಾ ಕರೋನಾ 
ಪುರೋಹಿತರನ್ನು ಕರೆದು ಹೋಮ ಮಾಡಿಸೋಣ 
ತಾಳ್ಮೆಯಿಂದ ಕೇಳಿದ ಮೇಲೆ ಕಾಲರ್ ಟ್ಯೂನು 
"ಸ್ವಾಮೀ ನಿಮ್ಮ ಹಾಗೆಯೇ ನಾನೂ ಕ್ವಾರಂಟೀನು 
ಬೇಕಾದರೆ ಮಾಡೋಣ ಹೋಮ ವರ್ಕ್ ಫ್ರಮ್ ಹೋಮ" 


ಸರಸ 
******
ಟಿವಿಯಲ್ಲಿ ನೋಡಿನೋಡಿ  ಅತ್ತೆ ಸೊಸೆ Vರಸ 
ಬೋರಾಗಿತ್ತು ಎಂದಳು ಪಕ್ಕದ ಮನೆ ಸರಸ 
ಈಗ ಸೀರೆಗೆ ಮ್ಯಾಚಿಂಗ್ ಮಾಸ್ಕ್ ಧರಿಸಿ 
ಶುಚಿದರ್ಶಿನಿಯಿಂದ ಪಕೋಡಾ ತರಿಸಿ 
ಕೂತಿದ್ದಾಳೆ ನೋಡುತ್ತಾ ಕರೋನಾ Yರಸ 


ವಸತಿ 
*******ದೊಡ್ಡ ಸಾಹೇಬರು "ವರ್ಕ್ ಫ್ರಮ್ ವಸತಿ"  
ಬೆಲ್ ಒತ್ತಿ "ಕಾಫಿ"  ಎಂದು ಕೂಗಿದರು ಮೂರು ಸರತಿ 
ಒಳಗಿಂದ ಒಂದು ಧ್ವನಿ  ಸಾಹೇಬರ ಬೀವೀ  
"ನನಗೂ  ಬೇಕು, ಸ್ವಲ್ಪ ಸ್ಟ್ರಾಂಗ್ ಇರಲಿ ರೀ"  
"ಓಕೇ" ಎಂದು ಸಾಹೇಬರು ಮೇಲೆದ್ದರು ಪಾಲಿಸಲು ಅಣತಿ 


ಭೀತಿ 
******
ಆಫೀಸ್ ಕ್ಯಾಂಟೀನಲ್ಲಿ ಕಾಫಿ, ತಿಂಡಿ, ಊಟ   
ಸಿಕ್ಕರೂ ಮೂಗು ಮುರಿಯುವುದು ಐಟಿ ಪರಿಪಾಠ
ಈಗ ತಾನೇ ಕಿಚನ್ನಿನೊಳಗೆ ಹೋಗಿ 
ಬೇಯಿಸಿಕೊಳ್ಳುತ್ತಿರುವನು  ಮ್ಯಾಗಿ 
ಮನೆಗೆ ಪೀಟ್ಸಾ ತರಿಸಲು ಕೊರೋನಾ ಭೀತಿ ವಿಪರೀತ 
ರಂಗು 
*****
ಕರೋನಾದಿಂದ ಕಳೆಗುಂದಿದೆ ವ್ಯಾಪಾರದ ರಂಗು
ಹೀಗೆ ಅನ್ನಿಸುತ್ತಿತ್ತು ರೀ ವಾರದಿಂದ ನಂಗೂ
ಕಳೆಗುಂದಿಲ್ಲ ಬಣ್ಣ ಬದಲಾಗಿದೆ ಅಷ್ಟೇ
ಮಾಸ್ಕ್ ವ್ಯಾಪಾರಿಗಳಿಂದ ತುಂಬಿದೆ ಮಾರುಕಟ್ಟೆ
ಐನೂರು ರೂ ಅಂತೆ ಗೋಮೂತ್ರ, ಕೌಡಂಗು