ಯಾರು ದಲಿತರು?

ಸಿ ಪಿ ರವಿಕುಮಾರ್ 

ಈಗಾಗಲೇ ಜಗತ್ತಿನ ಜನಸಂಖ್ಯೆ ಏಳು ನೂರು ಕೋಟಿಯ ಸಮೀಪವಾಗಿದೆ. ಇದರಲ್ಲಿ ಭಾರತೀಯರೇ ೧೨೫ ಕೋಟಿ ಇದ್ದಾರೆ. ಜಗತ್ತಿನ ಅತ್ಯಂತ ದೊಡ್ಡ ಜನಸಂಖ್ಯೆಯ ದೇಶವಾಗುವತ್ತ ಭಾರತ ದಾಪುಗಾಲು ಹಾಕುತ್ತಿದೆ. ಮನುಷ್ಯರಲ್ಲದೆ ಮೃಗಗಳಿಗೂ ಆಹಾರ-ನೀರು ಬೇಕು ಎನ್ನುವುದನ್ನು ಮರೆಯಬೇಡಿ. ನೀರಿಗಾಗಿ ಈಗಾಗಲೇ ಹೋರಾಟಗಳು ನಡೆಯುತ್ತಿವೆ. ಇಂಥ ಸಂದರ್ಭದಲ್ಲಿ ನೀರನ್ನು ಅತ್ಯಂತ ಕಡಿಮೆ ಉಪಯೋಗಿಸಿ ಬೆಳೆಯುವ ಆಹಾರಗಳು ನಮಗೆ ಮುಖ್ಯವಾಗಬೇಕು ಎನ್ನುವುದು ಎಲ್ಲರ ಹಿತದ ದೃಷ್ಟಿಯಿಂದ ಸರಿಯಾದ ಮಾತು. ನೀರಿನ ಬಳಕೆಯಲ್ಲಿ ಮಾಂಸಾಹಾರ ಉತ್ಪಾದನೆಯದೇ ಹಿರಿಯ ಪಾಲು. ಹೀಗಾಗಿ ಸಸ್ಯಾಹಾರ ಬಳಸಿ ಎಂದು ವಿಜ್ಞಾನಿಗಳು ಕೂಗುತ್ತಲೇ ಇದ್ದಾರೆ. ಕೆಳಗೆ ನಾನು ಹಿಂದೆ ಬರೆದ ಲೇಖನವೊಂದನ್ನು ಕೊಟ್ಟಿದ್ದೇನೆ.

ನೆನಪಿರಲಿ - ಯಾವುದೇ ವಸ್ತು ಸೀಮಿತವಾಗಿದ್ದಾಗ ಅದನ್ನು ಜೋಕೆಯಿಂದ ಬಳಸುವುದು ಎಲ್ಲರ ಹಿತ. "ಇಲ್ಲ, ನಾನು ನನಗೆ ಹೇಗೆ ಬೇಕೋ ಬಳಸುತ್ತೇನೆ" ಎಂದು ಹೊರಡುವುದು ಕೇವಲ ಕೆಲವರಿಗೆ ಹಿತ - ಹೀಗಾದಾಗ ಆರ್ಥಿಕವಾಗಿ-ದೈಹಿಕವಾಗಿ ದುರ್ಬಲರಾದವರು ("ದಲಿತರು") ನಾಶವಾಗದೇ ಉಳಿಯುತ್ತಾರಾ ಯೋಚಿಸಿ. ಹೀಗಿರುವಾಗ ಜನರನ್ನು ತಪ್ಪು ಹಾದಿಗೆ ಎಳೆದು ಅವರಿಗೆ ದನದ ಮಾಂಸವನ್ನೂ ತಿನ್ನಿ ಎಂದು ಬೋಧಿಸಿದವರಿಗೆ ಅಕಾಡೆಮಿ ಪ್ರಶಸ್ತಿಯ ಗೌರವ ಸಿಕ್ಕಿದ್ದು ದುರ್ದೈವದ ವಿಷಯ.

ದಲಿತ ಎಂದರೆ ಜಾತಿಯಲ್ಲ, ಧರ್ಮವಲ್ಲ.  ಮಾತು ಬಾರದ ಮೃಗಗಳು ನಿಜವಾದ ದಲಿತವರ್ಗ.  ಮನುಷ್ಯನ ದಬ್ಬಾಳಿಕೆಗೆ ನಲುಗುತ್ತಿರುವ ಕಾಡು-ನೆಲ-ಜಲಗಳು ಇಂದು ದಲಿತವರ್ಗ. ದೈಹಿಕ/ಆರ್ಥಿಕವಾಗಿ ದುರ್ಬಲರಾದವರು ದಲಿತವರ್ಗ. ಮನುಷ್ಯನಿಗೆ ಬಿಟ್ಟರೆ ಅವನು ಮೃಗಗಳನ್ನು ಸರ್ವನಾಶ ಮಾಡುತ್ತಾನೆ ಎಂಬ ಮುಂದಾಲೋಚನೆಯಿಂದಲೋ ಏನೋ ಕೆಲವು ಧರ್ಮಗಳಲ್ಲಿ ಪ್ರಾಣಿಗಳಿಗೆ ದೇವರ ಸ್ಥಾನ ನೀಡಲಾಗಿದೆ. ಜಲ-ನೆಲ-ಬೆಟ್ಟ-ಗುಡ್ಡ ಎಲ್ಲವನ್ನೂ  ದೇವರೆಂದು ಬಗೆಯಲಾಗಿದೆ. ಇದು ನಮ್ಮ ಪರಿಸರವನ್ನು ಮತ್ತು ತನ್ಮೂಲಕ ನಮ್ಮನ್ನು ನಾವೇ ಕಾಪಾಡಿಕೊಳ್ಳುವ ಜಾಣ್ಮೆ. 

 ಯಾವುದು/ಯಾರು ದಲಿತರ ಪರ ಎನ್ನುವುದನ್ನು ನೀವೇ ಯೋಚಿಸಿ ನಿರ್ಧರಿಸಿ. ಬೇರೆಯವರು ಹೇಳಿದ್ದನ್ನು ಕೇಳಿಸಿಕೊಳ್ಳಿ - ಆದರೆ ಅವರು ತಮ್ಮ ಸ್ವಾರ್ಥಕ್ಕಾಗಿ ಕೂಡಾ ಹೇಳುತ್ತಿರಬಹುದು ಎನ್ನುವ ಎಚ್ಚರ ಇರಲಿ. ನಮಗೆ ದೇವರು ಕೊಟ್ಟ ಬುದ್ಧಿ ಉಪಯೋಗಿಸಿದಾಗಲೇ ನಾವು "ಬುದ್ಧಿಜೀವಿ"ಗಳಾಗುತ್ತೇವೆ.