ಖಗೋಳಶಾಸ್ತ್ರ ಮತ್ತು ತಾರೆ

ಮೂಲ: ವಾಲ್ಟ್ ವ್ಹಿಟ್ಮನ್

ಕನ್ನಡ ಅನುವಾದ: ಸಿ. ಪಿ. ರವಿಕುಮಾರ್

ಖಗೋಳಶಾಸ್ತ್ರ ಪಂಡಿತನೊಬ್ಬನ ಉದ್ದುದ್ದ ವಿವರಣೆ ಕೇಳುತ್ತಾ 

ಭಾಗಾಕಾರ ಗುಣಾಕಾರಗಳೊಂದಿಗೆ ಪುರಾವೆಗಳು ಮೈದಾಳುತ್ತಾ 

ಅಗೋಚರ ಆಕಾಶಕಾಯಗಳನ್ನು ಮಾಪನ ಮಾಡಿ

ಯುಗಾಂತರಗಳ ಆಚೆಗೂ ಇಣುಕಿ ನೋಡಿ

ಆಗಾಗ ಭಾಷಣ ಸಭಾಗೃಹದಲ್ಲಿದ್ದ ಶ್ರೋತೃಗಣ 

ಮುಗಿಲುಮುಟ್ಟುವ ಹಾಗೆ ಮಾಡುತ್ತಿತ್ತು ಕರತಾಡನ.

ನನಗೆ ಸಾಕಾಗಿಹೋಯಿತು ಅದೇಕೋ; ಮೇಲೆದ್ದೆ,

ಜನರ ನಡುವೆ ನುಸುಳಿ ಹೇಗೋ ಹೊರಗೆ ಬಂದೆ.

ತಂಗಾಳಿಗೆ ಮೈಯೊಡ್ಡಿ ನಿಂತೆ ಒಂದಷ್ಟು ಹೊತ್ತು,

ಹಾಗೇ ನಡೆದೆ ಇಲ್ಲದೆ ಯಾವ ಗುರಿಗೊತ್ತು.

ಅಗಾಧ ಆಕಾಶದ ಕಡೆಗೆ ಬೀರುತ್ತ ದೃಷ್ಟಿ,

ಸಾಗಿದೆ ಕೇಳುತ್ತಾ ತಾರೆಗಳ ಮೌನಗಾನಗೋಷ್ಠಿ.