ಲೇಖನಿ, ಇಂದವರನ್ನು ನೆನೆ!

ಕವಿತೆ ಓದುವ ಮುನ್ನ 

ಸ್ವಾತಂತ್ರ್ಯಕ್ಕಾಗಿ ನಡೆದ ಹೋರಾಟದಲ್ಲಿ ಇತಿಹಾಸವಾಗಿ ಇಂದು ನೆನಪಿನಲ್ಲಿ ಉಳಿದವರು ಕೆಲವರು; ಆದರೆ ಲಕ್ಷಾಂತರ ಭಾರತೀಯ ಜನಸಾಮಾನ್ಯರು ಈ ಹೋರಾಟದಲ್ಲಿ ಭಾಗವಹಿಸದಿದ್ದರೆ ಅದಕ್ಕೆ ಅರ್ಥವಿರುತ್ತಿರಲಿಲ್ಲ. ದಿನಕರ್ ತಮ್ಮ ಕವಿತೆಯಲ್ಲಿ ಇಂಥ ಸಾಮಾನ್ಯರಿಗೆ ನಮನ ಸಲ್ಲಿಸುತ್ತಾರೆ. ಗಾಂಧೀಜಿ ಸತ್ಯಾಗ್ರಹಕ್ಕೆ ಕರೆ ಕೊಟ್ಟಾಗ ಸಾಮಾನ್ಯರು ಅವರ ಮಾರ್ದನಿಯಾಗಿ ಅಲ್ಲಿರುತ್ತಿದ್ದರು. ಈ ಜನಸಾಮಾನ್ಯರ ಸ್ವಂತ ಪ್ರಭಾವಳಿ ದೊಡ್ಡದಲ್ಲದೇ ಇರಬಹುದು; ಆದರೆ ಅವರು ಲಕ್ಷಾಂತರ ಸಂಖ್ಯೆಯಲ್ಲಿ ಉರಿದು ಭಾರತದ ಸ್ವಾತಂತ್ರ್ಯಕ್ಕೆ ನಾಂದಿಯನ್ನಿಟ್ಟರು. ಗಾಂಧಿ, ನೆಹರೂ, ಲಾಜಪತ್ ರಾಯ್, ಪಟೇಲ್ ಇಂಥವರೆಲ್ಲ ಕಣ್ಣಿಗೆ ಕುಕ್ಕುವ ಬೆಳಕುಗಳು; ಹಾಗೆಂದು ಅವರನ್ನು ಮಾತ್ರ ನೆನೆದರೆ ಇತಿಹಾಸಕ್ಕೆ ಅಪಚಾರವಾಗುತ್ತದೆ ಎಂಬುದು ಕವಿತೆಯ ಆಶಯ. "ದಿನಕರ್" ಸ್ವಾತಂತ್ರ್ಯಪೂರ್ವದಲ್ಲಿ ಬರೆಯಲು ಆರಂಭಿಸಿದ ಹಿಂದಿ ಕವಿ. ಸ್ವಾತಂತ್ರ್ಯ ಸಂಗ್ರಾಮವನ್ನು ಹತ್ತಿರದಿಂದ ನೋಡಿದವರು.  ಜ್ಞಾನಪೀಠ ಪ್ರಶಸ್ತಿಯಿಂದ ಪುರಸ್ಕೃತರಾದ ಹಿಂದಿ ಕವಿ.

ಮೂಲ ಹಿಂದಿ ಕವಿತೆ: ರಾಮಧಾರಿ ಸಿಂಹ್ "ದಿನಕರ್"
ಕನ್ನಡ ಅನುವಾದ: ಸಿ.ಪಿ. ರವಿಕುಮಾರ್ 




ಅದೆಷ್ಟು ಸಲ ಇಂಥವರ ಅಸ್ಥಿಗಳ ಸುಟ್ಟೆವೋ
ಎಷ್ಟು ಸಲ ಇಂಥವರ ಚಿತೆಗೆ ಕಿಡಿ ಕೊಟ್ಟೆವೋ
ಸೇರಿದರು ಹೇಗೋ ತಮ್ಮ ಕೊನೆಯ ನೆಲೆ
ಗಳಿಸಲಾರದೆ ತಮ್ಮ ನಿಜವಾದ ಬೆಲೆ -
ಲೇಖನಿ, ಇಂದವರನ್ನು ನೆನೆ!

ಲೆಕ್ಕವಿಲ್ಲದ ಎಷ್ಟು ಪುಟ್ಟ ಹಣತೆಗಳು
ಸೆಣಸಾಡಿ ಬಿರುಗಾಳಿಯಲ್ಲಿ ಕೊನೆವರೆಗೂ
ಆರಿಹೋದವು! ಉರಿದದ್ದೆ ಇವರ ಸಾರ್ಥಕತೆ
ಬಾಯ್ಬಿಟ್ಟು ಸ್ನೇಹಕ್ಕಾಗಿ ಹಾತೊರೆಯದೇ  -
ಲೇಖನಿ, ಇಂದವರನ್ನು ನೆನೆ!

ಪ್ರತಿಫಲಿಸುತ ಸೊಡರಿನ ನಸುಬೆಳಕು
ದಿಶೆ ದಿಶೆಗೂ ಹಬ್ಬಿತು ಮುಂಜಾವು!
ಮಾತೇನಿದ್ದರೂ ಮೆಲುದನಿಯಲ್ಲೇ
ಮಾರ್ದನಿಯೋ ಕೇಸರಿಯ ಗರ್ಜನೆ! -
ಲೇಖನಿ, ಇಂದವರನ್ನು ನೆನೆ!

ಕುಕ್ಕುವ ಬೆಳಕಿಗೆ ಕುರುಡಾದವನು
ಇತಿಹಾಸವನವನೇನು ಬಲ್ಲನು?
ಸೂರ್ಯ ಚಂದ್ರ ಭೂಮಿಯು ಹೇಳುತಿವೆ
ಮೌನಸಾಕ್ಷಿ ಇಂಥವರ ಮಹಿಮೆಗೆ -
ಲೇಖನಿ, ಇಂದವರನ್ನು ನೆನೆ!

Kannada translation of a Hindi poem कलम, आज उनकी जय बोल by Ramdhari Singh Dinakar