ಹೂವಿನ ಬಯಕೆ

ಮೂಲ ಹಿಂದಿ ಪದ್ಯ: ಮಾಖನ್ ಲಾಲ್ ಚತುರ್ವೇದಿ 

ಕನ್ನಡಕ್ಕೆ: ಸಿ.ಪಿ. ರವಿಕುಮಾರ್ 

ಮುಡಿಯುವ ಆಭರಣವಾಗಲೇ ದೇವಕನ್ಯೆಯ 

ಜಡೆಯಲ್ಲಿ? ಇಲ್ಲ,  ಆ ಬಯಕೆ ನನಗಿಲ್ಲ. 

ಮದುಮಗನು ನಲ್ಲೆಗರ್ಪಿಸುವ ಹಾರಕ್ಕೆ 

ಪದಕವಾಗುವ ತವಕ ನನ್ನೊಳಗಿಲ್ಲ. 

ಕೊಂಡೊಯ್ದು ಇರಿಸದಿರು ಗೋರಿಕಲ್ಲಿನ ಮೇಲೆ 

ಹಿಂದೆ ಎಂದೋ ಆಳಿ ಅಳಿದ ರಾಜನಿಗೆ!

ಮಂದಿರದ ಮೂರ್ತಿಶಿಲೆ ಮೇಲಿಡದಿರು, ನನಗಿಲ್ಲ 

ಒಂದೆರಡು ಕ್ಷಣದ ಧನ್ಯತೆಯ ಬಯಕೆ!

ಕೊಂಡೊಯ್ದು ನನ್ನನ್ನು ಓ ವನಮಾಲಿ! ಎಸೆದುಬಿಡು 

ಬಂಧು ಸೈನಿಕರು ಮುನ್ನುಗ್ಗುವ   ಹಾದಿಯಲ್ಲಿ 

ಇಂದು ತಾಯ್ ಭೂಮಿ ರಕ್ಷಣೆಗೆ ಹೊರಟವರ 

ಪದತಲದಲೆನ್ನ  ಬಾಳಿನ ಅರ್ಥ ಹೊಮ್ಮಿ ಬರಲಿ!

Translation by C.P. Ravikumar of a Hindi Poem by Makhanlal Chaturvedi

[ಚಿತ್ರ: ಶ್ರೀನಿವಾಸನ್ ಮಾರ್ಗಸಹಾಯಂ]