ಚೈನಾ ಬಿತ್ತುತ್ತಿದೆಯಂತೆ ಚಂದ್ರನ ಮೇಲೆ ಆಲೂ (ಗಜಲ್)

ಸಿ. ಪಿ. ರವಿಕುಮಾರ್ 


ಚೈನಾ ಬಿತ್ತುತ್ತಿದೆಯಂತೆ ಚಂದ್ರನ ಮೇಲೆ ಆಲೂ
ಮುಂದೊಮ್ಮೆ ಕರೆದೀತು ಚಂದ್ರಿಕೆಯು ಹಾಲು

ಟ್ರಾಕ್ಟರ್ ಓಡಿಸಿ ಚಂದ್ರವದನದ ಮೇಲೆಲ್ಲಾ
ಹದಮಾಡಿ ಬಿತ್ತಬಹುದು ನೆಲಗಡಲೆ ಕಾಳು

ಈಗಾಗಲೇ ಅಲ್ಲಿ ನೆಲೆಸಿರುವ ಉಡುಪಿ ಭಟ್ಟರು
ವಿಸ್ತರಿಸಬಹುದು ಇನ್ನಷ್ಟು ಇಡ್ಲಿವಡೆ ಹೋಟೆಲು

ಬೆಳೆಯಬಹುದು ನಾಳೆ ಇಂದುವಿನ ಮೇಲೆ
ಸೂಜಿಮಲ್ಲಿಗೆ ದುಂಡುಮಲ್ಲಿಗೆಯ ಸಾಲು

ದ್ರಾಕ್ಷಿಬಳ್ಳಿಯು ಹಬ್ಬಿ ಹಳದಿಚಂದ್ರನ ಮೇಲೆ
ತೂಗಬಹುದು ಬಾನಲ್ಲಿ ರಸಭರಿತ ಗೊಂಚಲು

ದ್ರಾಕ್ಷಾರಸವನ್ನು ತುಂಬಿತುಂಬಿ ಹೂಜಿಗಳಲ್ಲಿ
ಸಾಕೀಗಳು ನಿಂತಾರು ಚಂದಿರನ ಮೇಲೂ

ಮಧುಶಾಲೆ, ಸಾಕೀ, ಇತ್ಯಾದಿ ಕನವರಿಸುವ ಶಾಯರರು
ಹೋಗಿ ನಿಂತಾರು ಹಿಡಿದು ತಳವಿರದ ಬಟ್ಟಲು

ಚಂದ್ರಮುಖಿ ಎಂದೆಲ್ಲಾ ಕವನಿಸುವ ಪ್ರೇಮಕವಿ 
ಉಪಮೆಯಿಲ್ಲದೆ ಕಾಣುವನೆ ಪ್ರೇಮದಲಿ ಸೋಲು?