ರವಿ ಕಾಣದ್ದು

  ಹಿಂದಿ ಮೂಲ: ಅಜ್ಞೇಯ ಕನ್ನಡ ಅನುವಾದ: ಸಿ ಪಿ ರವಿಕುಮಾರ್ ಚಹಾ ಕುಡಿಯುತ್ತಾ ನಾನು ಅಪ್ಪನ ಬಗ್ಗೆ ಯೋಚಿಸುತ್ತಿದ್ದೇನೆ. ನೀವು ಎಂದಾದರೂ  ಚಹಾ ಕುಡಿಯುವಾಗ ನಿಮ್ಮ ತಂದೆಯ ಬಗ್ಗೆ ಯೋಚಿಸಿದ್ದೀರಾ? ಒಳ್ಳೆಯದಲ್ಲ ಅಪ್ಪಂದಿರ ಬಗ್ಗೆ ಯೋಚಿಸುವುದು. ನಮ್ಮ ಕಲಾಯಿ ಇಳಿದು ಹೋಗುತ್ತದೆ. ನಾವು ಬೇರೆ ಏನಾದರೂ ಆಗಬಹುದಿತ್ತು. ಈ ಆಲೋಚನೆಯ ತೊಂದರೆ ಏನೆಂದರೆ ನಾವು ಬೇರೇನಾದರೂ ಆಗಿದ್ದರೆ  ಬಹುಶಃ ನಮ್ಮ ತಂದೆಗೆ ಇನ್ನಷ್ಟು ಹತ್ತಿರವಾಗುತ್ತಿದ್ದೆವು ಇನ್ನಷ್ಟು ಅಪ್ಪನಂತೆ ಆಗುತ್ತಿದ್ದೆವು  ಎಂಬ ಸಾಕ್ಷಾತ್ಕಾರವಾಗುವುದು. ಅಪ್ಪನಂತೆ ಆಗಲು ಎಷ್ಟು  ದೂರ ಹೋಗಬೇಕಾಗುತ್ತದೆ ಅಪ್ಪನಿಂದ. ಅಪ್ಪನಿಗೂ ಬೆಳಗ್ಗೆ ಚಹಾ ಕುಡಿಯುವ ಅಭ್ಯಾಸವಿತ್ತು. ಅವರೂ ಯೋಚಿಸುತ್ತಿದ್ದರೆ  ತಮ್ಮ ಅಪ್ಪನ ಕುರಿತು? ಹತ್ತಿರವಾಗಿಯೋ ಅಥವಾ ದೂರವಾಗಿಯೋ?

ಮೂಲ : ರೇಮಂಡ್ ಕಾರ್ವರ್ ಅನುವಾದ: ಸಿ ಪಿ ರವಿಕುಮಾರ್  ಇವತ್ತು ಎದ್ದಾಗ ಯಾಕೋ ಇಡೀ ದಿವಸ ಮಲಗಿ ಹಾಸಿಗೆಯಲ್ಲೇ ಓದುವ ಖಯಾಲಿ. ಒಂದು ನಿಮಿಷ ಹೋರಾಡಿದೆ  ಅದಮ್ಯ ಆಸೆಯ ಜೊತೆಗೆ. ನಂತರ ಕಿಟಕಿಯಿಂದ ಹೊರಗೆ ಇಣುಕಿ ಸುರಿಯುವ ಮಳೆಯನ್ನು ನೋಡಿ ಸೋಲೊಪ್ಪಿಕೊಂಡೆ. ಇಡೀ ದಿವಸ ಬೆಳಗಿನ ಮಳೆಯ ಸುಪರ್ದಿಗೆ  ನನ್ನನ್ನು ಒಪ್ಪಿಸಿಕೊಂಡೆ. ನಾನು ಜೀವನವನ್ನು ಮತ್ತೊಮ್ಮೆ ಬದುಕಿದರೆ ಇಂಥ ತಪ್ಪನ್ನು ಮಾಡುವೆನೇ ಪುನಃ? ಅವಕಾಶ ಸಿಕ್ಕಿದರೆ ಖಂಡಿತಾ ಖಂಡಿತ.

ಕೆನಡಾ ಗಡಿಯಲ್ಲೊಂದು ಅ-ರಾಷ್ಟ್ರೀಯ ಸ್ಮಾರಕ  ಮೂಲ: ವಿಲಿಯಮ್ ಸ್ಟಾಫರ್ಡ್ (ಅಮೆರಿಕಾ ಸಂಸ್ಥಾನ)  ಕನ್ನಡಕ್ಕೆ: ಸಿ. ಪಿ. ರವಿಕುಮಾರ್  ಇದು ಯಾವ ಯುದ್ಧವೂ ನಡೆಯದ ಮೈದಾನ, ಯಾವ ಅನಾಮಧೇಯ ಸೈನಿಕನೂ ಇಲ್ಲಿ ಬಿಡಲಿಲ್ಲ ಪ್ರಾಣ, ಇಲ್ಲಿ ಕೈ ಹಿಡಿದವು ಎರಡೂ ಕಡೆ ಬೆಳೆದ ಹುಲ್ಲುಗರಿಕೆ, ಯಾವುದೇ ಸ್ಮಾರಕವನ್ನೂ ಕಟ್ಟಿಲ್ಲ ಅದಕ್ಕೆ, ಇಲ್ಲಿ ಕಾಣುವ ಏಕಮಾತ್ರ ವೀರ ಚಿಹ್ನೆ ಮುಕ್ತಗಗನ.   ಹಕ್ಕಿಗಳು ಹಾರಾಡುತ್ತವೆ ನಿಶ್ಶಬ್ದವಾಗಿ ಇಲ್ಲಿ  ರೆಕ್ಕೆ ಬಿಚ್ಚಿ ಮುಕ್ತವಾಗಿ ತೆರೆದ ಬಾನಿನಲ್ಲಿ, ಯಾರೊಬ್ಬರೂ ಸಾಯಲಿಲ್ಲ ಈ ಬಯಲಿನ ಮೇಲೆ, ಎಷ್ಟು ಪಳಗಿದೆ ಬಯಲುಗಾಳಿ, ನಿರ್ಲಕ್ಷ್ಯದಿಂದೆಷ್ಟು ಪವಿತ್ರವಾಗಿದೆ ಬಯಲೆಂದರೆ, ಇದರ ಹೆಸರನ್ನು ಮರೆಯುವುದೇ ಜನರು ಕೊಟ್ಟ ಬಳುವಳಿ.  At the Un-National Monument Along the Canadian Border Birds fly here without any sound, unfolding their wings across the open. No people killed — or were killed — on this ground hallowed by neglect and an air so tame that people celebrate it by forgetting its name. —William E. Stafford

  ಎಲ್ಲಿ ಕಾಣಲೇ ಇಲ್ಲವಲ್ಲ ಬಹಳ ದಿನ ಎಲ್ಲಿ ಹಾರಲು ಪ್ರೇರೇಪಿಸಿತು ಮನ! ಒಮ್ಮೊಮ್ಮೆಯಾದರೂ ಹಾಕುತ್ತಿರು ಸ್ವಂತಿ ಲೈಕ್ ಹಾಕಲಿ ಬಿಡಲಿ ಜನರು! ಏನಂತೀ? ಗೆಳೆಯರಾದ ಮೇಲೆ ಸ್ನೇಹ ಯಾಚಿಸಿ ಬಂದು ಕಾಣೆಯಾಗುವರಲ್ಲ ಕೆಲವು ಫೇಸ್ಬುಕ್ ಬಂಧು ಅವರಂತೆ ನೀನೂ ತಲೆ ಮರೆಸಿಕೊಂಡು ಹೋಗಿಬಿಟ್ಟೆಯೋ ಏನೋ ಮಾಡಿ ಅನ್ಫ್ರೆಂಡು! ಟ್ವೀಟ್ ಮಾಡುತ್ತಿರುವುದೆಲ್ಲ ಗೂಗೆ-ರಣಹದ್ದು ಎಂದು ನಿಲ್ಲಿಸಿಬಿಟ್ಟೆಯಾ ನಿನ್ನ ಚಿಲಿಪಿಲಿ ಸದ್ದು! ಯಾರೂ ಕಿವಿ ಮುಚ್ಚುವುದಿಲ್ಲ, ನಿನಗೇಕೆ ಚಿಂತೆ ನಿನ್ನುಲಿಗೇ ಕಾದಿರಬಹುದು ಗದ್ದಲದ ಸಂತೆ!

ಮೂಲ: ರೋಆಲ್ಡ್ ಡಾಲ್  ಅನುವಾದ: ಸಿ ಪಿ ರವಿಕುಮಾರ್  ಏನಪ್ಪಾ ಅಂದ್ರೆ ನಾವು ತಿಳಕೊಂಡ ಅತಿಮುಖ್ಯ ಸಂಗ್ತಿ  ಮಕ್ಕಳ ವಿಷಯದಲ್ಲಿ ನಾವು ಹಾಕಬೇಕಾದ ಮೇಲ್ಪಂಕ್ತಿ  ಅವರನ್ನು ಬಿಡಬಾರ್ದು ಬಿಲ್ಕುಲ್ ಖಡಾಖಂಡಿತ ಟೆಲಿವಿಷನ್ ಸೆಟ್ ಹತ್ತಿರವೂ ಗೊತ್ತಾಯ್ತ? ಅದಕ್ಕಿಂತಲೂ ಕೊಡ್ಲಾ ಇನ್ನೊಂದು ಸಲಹೆ? ತರಲೇ ಬೇಡಿ ಹಾಳಾದ್ದನ್ನು ಮನೆಗೆ. ನಾವು ಹೋಗಿ ನೋಡಿದ ಪ್ರತಿಯೊಂದು ಮನೆಯಲ್ಲೂ  ಕೂತಿದ್ದರು ಜನ ಸುರಿಸುತ್ತಾ ಜೊಲ್ಲು  ಚಪ್ಪರಿಸುತ್ತಾ ಬಾಯಿ ಕಣ್ಣು ಮಿಟುಕಿಸದೇ  ಹೊರಕ್ಕೆ ಬಂದು ಬಿಡುವಂತೆ ಕಣ್ಣುಗಳ ಗುಡ್ಡೆ - (ನೋಡಿದೆವು ಹೋದವಾರ ಒಬ್ಬರ ಮನೆಯಲ್ಲಿ  ನೆಲದ ಮೇಲೆ ಕಣ್ಗುಡ್ಡೆ ಹತ್ತಾರು ಚೆಲ್ಲಾಪಿಲ್ಲಿ) ಕುಳಿತು ದುರುಗುಟ್ಟುತ್ತಾರೆ, ಕೂಡುತ್ತಾರೆ ದುರುಗುಡ್ತಾ   ಹಾಗೇ ಅದರ ಮೋಡಿಗೆ ಒಳಗಾಗಿಬಿಡ್ತಾ  ಟೈಟ್ ಆಗುತ್ತಾರೆ ಕುಡಿ ಕುಡಿದು ಕುಡಿದು ಅದರಲ್ಲಿ ಬರುವ ಹೊಲಸು ಪ್ರತಿಯೊಂದೂ.  ಅವರೇಕೆ ಸ್ತಬ್ಧರಾಗಿದ್ದಾರೆ ನಮಗೀಗ ಗೊತ್ತು  ಹೊರಗೇ ಬರುವುದಿಲ್ಲ ಅವರು ಸಂಜೆ ಹೊತ್ತು  ಕೂತಿದ್ದಾರೆ ಕಬಡ್ಡಿ ಗಿರಗಿಟ್ಲೆ ಮರೆತು  ಅಡುಗೆ ಕೆಲಸವನ್ನೆಲ್ಲಾ ನಿಮಗೇ ಬಿಟ್ಬಿಟ್ಟು    ತೊಳೆ-ಬಳೆವ ಕೆಲಸವೂ ನಿಮ್ಮದೇ ಸ್ವತ್ತು  ಯೋಚಿಸಿದ್ದೀರಾ ಯಾವತ್ತಾದ್ರೂ ಸ್ವಲ್ಪ ಹೊತ್ತು  ಇದರ ಪರಿಣಾಮ ಮ...

  ನಾವು ಅಡಿಗೆ ಕೆಲಸ ಮಾಡುವುದಿಲ್ಲ, ಏಕೆಂದರೆ  ಕುಳಿತಲ್ಲೇ ಬರುತ್ತದೆ ಆರ್ಡರ್ ಮಾಡಿದರೆ ನಾವು ಹೋಂ ವರ್ಕ್ ಮಾಡುವುದಿಲ್ಲ, ಏಕೆಂದರೆ ಮಾಡಿಕೊಡುತ್ತದೆ ಏಐ ನೀಡದೆ ಯಾವ ತೊಂದರೆ ಸ್ಕೂಲಿಗಾದರೂ ಯಾಕೆ ಹೋಗಬೇಕು ಹೇಳಿ ಕಲಿಯುತ್ತಿವೆಯಲ್ಲ ಮಶೀನ್ ದಿನಬೆಳಗಾದರೆ ಡ್ರೈವಿಂಗ್ ಕೂಡಾ ಈಗ ಬೇಕಾಗಿಲ್ಲ, ಏಕೆಂದರೆ ಬೇಕಿದ್ದರೆ ಹೋಗುತ್ತೇವೆ ಟ್ಯಾಕ್ಸಿ ಸರ್ವಿಸಿಗೆ ಮೊರೆ  ಹೊಲದಲ್ಲಿ ಕೆಲಸ ಮಾಡೆವು, ಏಕೆಂದರೆ ಇವೆಯಲ್ಲ ರೋಬಾಟ್ ಮಾಡುತ್ತವೆ ಹೇಳಿದರೆ ಗುಡಿಸಿ ಸಾರಿಸುವ ಕೆಲಸ ಕಲಿತಿಲ್ಲ ಏಕೆಂದರೆ  ಯಾಕೆ ಬೇಕು ಅವೆಲ್ಲ, ರೋಬಾಟ್ ಇರಬೇಕಾದರೆ ಎಲ್ಲವೂ ಬರುತ್ತದೆ ಬ್ರೋ ಆರ್ಡರ್ ಮಾಡಿದರೆ ಆರ್ಡರ್ ಮಾಡಲೂ ಆಪ್ ಇದೆಯಂತೆ ಬೇರೆ ಕೆಲಸವೇ ಕೈಲಾಸ ಎಂದೆಲ್ಲ ಹಲುಬಲು ನಾವು ಮುದುಕರೇ  ದುಡಿವ ರೋಬಾಟ್ ಹೋಗಲಿ ಕೈಲಾಸಕ್ಕೆ ಬೇಕಾದರೆ  ಸುಮ್ಮನೆ ಯಾಕೆ ಚಿಂತಿಸುತ್ತೀರಿ ಮಹಾಜನರೇ ರಾಜೀನಾಮೆ ಕೇಳಿದರಾಯ್ತು ಇವೆಲ್ಲ ಸಿಗದಿದ್ದರೆ ಇವರಲ್ಲದಿದ್ದರೆ ಅವರು, ಅವರಲ್ಲದಿದ್ದರೆ ಇನ್ನೊಬ್ಬರು ಯಾರಾದರೂ ಫ್ರೀ ಬೀ ಕೊಟ್ಟೇ ಕೊಡುತ್ತಾರೆ  ಪ್ರತಿಭಟಿಸಲು ಬೀದಿಗೆ ಇಳಿಯಬೇಕಿಲ್ಲ ಯಾರೂ  ರೋಬಾಟ್ ಬಂದಿವೆ ಅದಕ್ಕೂ ಎಂದು ಕೇಳಿರುವೆ.

  ಕುಂಚ ಆಡಿಸಿದ ವ್ಯಾನ್ ಗೋ ಬಣ್ಣದಲ್ಲಿ ಅದ್ದಿ  ಹಸಿರು ನೀಲಿ ಬಂಗಾರ ಹಳದಿ. ಬಾನಲ್ಲಿ ಚಿನ್ನ ಕರಗುವ ಹೊತ್ತು ಶಾಂತಿ ಎಲ್ಲಾ ಕಡೆಗೆ ಪಸರಿಸಿತ್ತು ಸದ್ದು ಮಾಡುತ್ತಾ ಹೊರಟಿದೆ ಕುದುರೆ ಸಾರೋಟು  ಅಗೋ ಇನ್ನೇನು ನಮ್ಮ ಹಳ್ಳಿ ಬಂತು ಕಲ್ಲುಹಾದಿಯ ಮೇಲೆ ಕಠಿಣ ಪ್ರವಾಸ ಮರೆತುಹೋಯಿತು ಪ್ರಯಾಣದ ಆಯಾಸ ಕಂಡಾಗ ದೂರದಲ್ಲಿ ಪರಿಚಿತ ಹಳ್ಳಿ ಇಕ್ಕೆಡೆಗೂ ಕೈಬೀಸುವ ಮರಗಿಡಬಳ್ಳಿ ಸೈಪ್ರೆಸ್ ಮರದಲ್ಲಿ ಹೊಕ್ಕು ತಂಗಾಳಿ ಬಳುಕುತ್ತಿದೆ ಮರ ಇಟ್ಟಂತೆ ಕಚಗುಳಿ. ನನ್ನ ಮೈಯೊಳಗೂ ಸಂಚರಿಸಿ ಅದೇ ಪುಳಕ ಮರೆಯುತ್ತೇನೆ ಒಂದೆರಡು ಕ್ಷಣ ಎಲ್ಲ ನರಕ. ಮನೆಯಲ್ಲಿ ನನಗಾಗಿ ಕಾಯುತ್ತಿರುವ ಹಿರಿಯ ಕೇಳುತ್ತಾನೆ ನೂರಾರು ಪ್ರಶ್ನೆ: ಬಂದೆಯಾ? ಹೇಗಿತ್ತು ದೂರದ ಪಟ್ಟಣದಲ್ಲಿ ವಾಸ? ಏನೇನು ಮಾಡಿದೆ ಒಳ್ಳೆಯ ಕೆಲಸ? ಕುಂಚ ಹಿಡಿದ ಕೈ ನಡುಗಿತು ಸಣ್ಣಗೆ ಪ್ರತ್ಯುತ್ತರ ಒಂದೂ ತೋರುತ್ತಿಲ್ಲ ನನಗೆ ಚಿಮ್ಮಿತು ಕಣ್ಣುಗಳ ತುದಿಯಲ್ಲಿ ನೀರು  ಸ್ವೀಕರಿಸುವುದೇ ನನ್ನನ್ನು ನನ್ನ ತವರೂರು ? ಏನು ಉಸುರುತ್ತಿದೆ ಸೈಪ್ರೆಸ್ ಮರಕ್ಕೆ ತಂಗಾಳಿ? ಏನೂ ಕೇಳುತ್ತಿಲ್ಲ ಗಾಡಿಯ ಗಡಗಡದಲ್ಲಿ . ಸಿ ಪಿ ರವಿಕುಮಾರ್  ಅಕ್ಟೋಬರ್ ೬, ೨೦೨೬

ಸಿ ಪಿ ರವಿಕುಮಾರ್  ಗಾಂಧಿ, ನಿನ್ನ ಕೊಲೆಯಾದದ್ದು ಕೂಡಾ ಫೇಕ್ ನ್ಯೂಸ್ ಇರಬಹುದೇ ಎಂಬ ಅನುಮಾನ ಹುಟ್ಟುತ್ತಿದೆ ಏಕೆಂದರೆ ಇಂದಿಗೂ ನಿನ್ನ ಮೇಲೆ ಗುಂಡಿನ ಮಳೆ ಪ್ರತಿದಿನವೂ ಸುರಿಯುತ್ತಿದೆ ಭೀತಿ ಹುಟ್ಟಿಸುವ ದ್ಯೂತದಲ್ಲಿ ಸೋತು ಹೋದರೆ ಹೇಗೆಂದು ಕೀತುಹೋದದ್ದನ್ನು ಪ್ರತಿನಿತ್ಯವೂ ಕಿತ್ತುವ ಪೀತಪತ್ರಿಕೆಯ ಪಾತಕ ಬರಹಗಳಲ್ಲಿ ಮಾತಿಗೆ ಬೆಲೆಯಿಲ್ಲದ ಸಾಮಾಜಿಕ ತಾಣಗಳಲ್ಲಿ  ಪ್ರತಿದಿನವೂ ನಿನ್ನ ಕೊಲೆಯಾಗುತ್ತದೆ ನೀನು ಭೀಷ್ಮಪಿತಾಮಹ ಹಾಗೆ ರಣರಂಗದಲ್ಲಿ  ನೇರವಾಗಿ ಕಾದಾಡಿ ಸೋಲಿಸಲು ಅಸಾಧ್ಯ ಹೇಗೆ ಕೊಲ್ಲುವುದು ಎಂದು ನಿನ್ನನ್ನೇ ಕೇಳಿದರೆ ತೋರಿಸುತ್ತೀಯೆ ನೀನೇ ದಾರಿ ಬರುತ್ತವೆ ನಿನ್ನ ಪೂರ್ವಜನ್ಮದಲ್ಲಿ ನೀನು ತಿಂದ  ಮಾಂಸ ತಂದೆಗೆ ಮಾಡಿದ ಮೋಸ ನೀನೇ ಹೇಳಿಕೊಂಡ ಕಥೆಗಳು ತೊಟ್ಟು ಹೊಸಹೊಸ  ವೇಷ ಸತ್ಯದೊಂದಿಗೆ ಪ್ರಯೋಗ ನಡೆಸುವ ಜನ ಚಿತ್ರವನ್ನು ಫೋಟೋಶಾಪ್ ಮೂಸೆಯಲ್ಲಿ ಕಾಯಿಸಿ ಕುಟ್ಟಿ ಬಡಿದು ಬಗ್ಗಿಸಿ ತೆಗೆಯುತ್ತಾರೆ ಎಲ್ಲರಿಗೂ ಸ್ವಯಂ ಗೋಚರ ಸತ್ಯ ನೀನು ಬಾಲೆಯೊಬ್ಬಳೊಂದಿಗೆ ಮಾಡುತ್ತಿರುವೆ ನೃತ್ಯ ತಂದೆ ಎಂದಿಗೂ ಹೇಳಿಕೊಳ್ಳಬಾರದು ಮಕ್ಕಳಿಗೆ ತನ್ನ ಯೌವ್ವನದ  ಎಡವಟ್ಟುಗಳನ್ನು ಮಕ್ಕಳಿಗೆ ಅಷ್ಟೇ ಸಾಕು ಅಪ್ಪನೂ ಮಾಡಿಬಿಟ್ಟದ್ದೇ ಎಂಬ ಅಣಕು ರಾಷ್ಟ್ರಪಿತನಾಗಿ ನೀನೂ ಇದನ್ನು ಪಾಲಿಸಬೇಕಾಗಿತ್ತು ಆದರೆ ನೀನು ಭಯಂಕರ ಸತ್ಯಾಗ್ರಹಿ ನಿನ್ನ ಪರವಾಗಿ ...

  ಸಿ ಪಿ ರವಿಕುಮಾರ್  ಎಲುಬು ಗಟ್ಟಿಯಾಗಿರಲು ಪ್ರತಿದಿನ ತಿನ್ನಿ ಒಂದು ಸ್ಪೂನು ಎನ್ನುವವರು ಹೇಳಲಿ ಹೇಗೆ ತಿನ್ನಲಿ ಸ್ಪೂನನ್ನು ನಾನು ವೆಜಿಟೇರಿಯನ್ ಡಯಟ್ಟಿನಲ್ಲಿ ಇಲ್ಲವಂತೆ ಸಾಕಷ್ಟು ಪ್ರೋಟೀನು  ಮತ್ತು ಇದೆಯಂತೆ ಅದರಲ್ಲಿ ಧಂಡಿಯಾಗಿ ಪ್ರೋಟೀನು    ಕುಂಬಳಕಾಯಿ ಬೀಜ ಬಾದಾಮಿ ಹುರಿಗಡಲೆಯನ್ನು ಕುಟ್ಟಿ ಪುಡಿಮಾಡಿ ತಿನ್ನಬೇಕಂತೆ ಎರಡೆರಡು ಸ್ಪೂನು       ಕೂದಲು ಗಟ್ಟಿಯಾಗಿರಲು ದಿನಾ ಬೆಳಗ್ಗೆ ರಾತ್ರಿ ಏನೋ ಸೇವಿಸಬೇಕಂತಲ್ಲ ಮರೆತುಹೋಯಿತು ಏನು ಮರೆವು ಹೆಚ್ಚಾದರೆ ಅದಕ್ಕೂ ಇದೆ ಒಂದು ಸ್ಪೂನು ಎಂಥದ್ದೋ ಪುಡಿ, ತಿನ್ನಬೇಕು ಜೊತೆಗೆ ಜೇನು ಕೂದಲು ಇರುವುದೇ ಒಂದೆರಡು ಬೆಳ್ಳಗಾಗಿವೆ ಅವೂನೂ  ಮ್ಯಾಜಿಕ್ ತೈಲದ ಭರವಸೆ ಮಾತ್ರ ತೊರೆದಿಲ್ಲ ಇನ್ನೂ ಮುಂದೆ ಬಂದರೆ ಹೊಟ್ಟೆ ಪಾಪ ಆದರೆ ತಪ್ಪೇನು ಮುಂದೆ ಬರುವ ಇಚ್ಛೆ ನಿಮಗಿಲ್ಲವೇನು? ಪ್ರತಿಯೊಂದು ಅಂಗಾಂಗಕ್ಕೂ ಒಂದೊಂದು ಸ್ಪೂನು  ತಿನ್ನುವುದು ಯಾವಾಗ ಲಂಚ್ ಮತ್ತು ಡಿನ್ನರ್ ನಾನು   

ಮೂಲ: ಏಮಿ ಗ್ರಿಮ್  ಕನ್ನಡ ಅನುವಾದ: ಸಿ ಪಿ ರವಿಕುಮಾರ್  ಪ್ರಿನ್ಸ್ ರಸ್ತೆಯಲ್ಲಿರುವ ಹೂವಿನ ಅಂಗಡಿಯಲ್ಲಿ ಕೆಲಸ ಮಾಡುವ ಮಹಿಳೆ ಇದ್ದಾಳಲ್ಲ ಅವಳು ಕೊರಿಯಾದಲ್ಲಿ ಸೂಲಗಿತ್ತಿಯೇ ಆಗಿದ್ದಿರಬೇಕು. ಗುಲಾಬಿಗಳನ್ನು ಟಿಶ್ಯೂ ಕಾಗದದಲ್ಲಿ ಜಾಗರೂಕತೆಯಿಂದ ಸುತ್ತುವಾಗ ಎಷ್ಟು ಮಮತೆಯಿಂದ ನೋಡುತ್ತಾಳೆ ಅವುಗಳ ಕಡೆಗೆ ಮತ್ತು ಇಡುತ್ತಾಳೆ ನಮ್ಮ ಕೈಯಲ್ಲಿ ಹಗುರವಾಗಿ. ಎಷ್ಟೆಂದರೆ ಕೊಡುತ್ತಿರುವಳೇನೋ ನಮ್ಮ ಕೈಗೆ ನವಜಾತ ಶಿಶುವನ್ನು ಅಥವಾ ಒಂದು ಗ್ರೆನೇಡನ್ನು ಎಂಬಂತೆ. ನನಗೆ ತಾಯಾಗುವುದು ಬೇಡ. ಆದರೂ ನನ್ನ ಎಡಗೈ ಕಂಕುಳಿಗೆ ಮಗುವನ್ನು ಎತ್ತಿಕೊಳ್ಳುವುದು  ಸಹಜ ಕ್ರಿಯೆ. ನಡೆದು ಬರುವಾಗ ಒಬ್ಬ ನಿರ್ಗತಿಕ ನನ್ನ ಕಡೆ ನೋಡಿ ಹೇಳಿದ್ದು  ಮಗುವಿನ ಮುಖ ನಿಮ್ಮಂತೆಯೇ ಇದೆ.

  ಮೂಲ : ಹೇಡೆನ್ ಕಾರುತ್ ಅನುವಾದ: ಸಿ ಪಿ ರವಿಕುಮಾರ್  ನನ್ನ ಪ್ರಾರ್ಥನೆಗಳು ಫಲ ನೀಡಿವೆ. ಅವುಗಳನ್ನು ಪ್ರಾರ್ಥನೆ ಎನ್ನುವುದಾದರೆ. ನಾನು ಬದುಕಿದ್ದೇನೆ. ಇನ್ನೂ ಜೀವಂತವಾಗಿದ್ದೇನೆ. ಆರೋಗ್ಯವಾಗಿಯೇ ಇದ್ದೇನೆ ಎನ್ನಬಹುದು. ಸಿಗರೇಟ್ ಬಿಟ್ಟರೆ ನೂರು ವರ್ಷ ಬದುಕಿಯೇನು. ಇದು ನಿಜಕ್ಕೂ ಆಶ್ಚರ್ಯವೇ - ಅಷ್ಟೆಲ್ಲ ಬಡತನ, ನೋವು ಅನುಭವಿಸಿ, ನರಳಿ. ಯಃಕಶ್ಚಿತ್ ಸಹನೆಯಿಂದ ಇಷ್ಟೆಲ್ಲ ಸಾಧ್ಯವಾದೀತೆಂದು  ಎಣಿಸಿರಲಿಲ್ಲ. ಮತ್ತು ಪ್ರಾರ್ಥನೆಗಳು? ಅವು ಪ್ರಾರ್ಥನೆಗಳಾಗಿದ್ದವೆ? ನಾನು ಉದ್ದಕ್ಕೂ ಯಾವ ಧರ್ಮಕ್ಕೂ ಅಂಟಿಕೊಳ್ಳದ ಛಲಕ್ಕೆ ಬಲವಾಗಿ ಅಂಟಿಕೊಂಡವನು. ಅದಕ್ಕೆ ಕಾರಣವೂ ಇತ್ತು. ಇಷ್ಟಾದರೂ  ಈಗ ವಯಸ್ಸಾದ ಮೇಲೆ ನನಗೆ ಅರ್ಥವಾಗುತ್ತಿದೆ, ಪ್ರಾರ್ಥನೆ ಎಂದರೆ ಅದೊಂದು ಶಿಸ್ತಲ್ಲ, ಸಿದ್ಧಾಂತವಲ್ಲ, ಇನ್ನಿತರ ಪ್ರಾಣಿಗಳಿಗಿಂತ ವಿಭಿನ್ನವಾಗಿ  ಮನುಷ್ಯನ ಪ್ರಾಕೃತಿಕ ಬುದ್ಧಿಯ ಚಲನೆ. ನಾನು ಪ್ರಾರ್ಥಿಸಿದೆ. ಮತ್ತು ಹಾಳೆಗಳ ಮೇಲೆ ಬರೆದಿಟ್ಟುಕೊಂಡೆ ನಾನು ಉಸುರಿದ ಒಂದಿಷ್ಟು ಪದಗಳನ್ನು. ಅವೇ ಈ ಪದ್ಯಗಳು.

 ಮಳೆ ಪದ್ಯ  ಮಳೆ ಬರುತ್ತಿದೆ, ಹೊಯ್ಯುತ್ತಿದೆ,  ಧೋ ಎಂದು ಸುರಿಯುತ್ತಿದೆ. ಟಪಟಪ ಉದುರುತ್ತಿದೆ. ತುಂತುರು ತುಂತುರಾಗಿ ಒಮ್ಮೆ ಪಟಪಟ ಬೀಳುವ ಹನಿ. ಧಾರಾಕಾರವಾಗಿ ಇನ್ನೊಮ್ಮೆ ದೇವರು ಸುರಿಸಿದಂತೆ ಕಂಬನಿ. ಮುಸಲಧಾರೆಯಾಗಿ ಒಮ್ಮೊಮ್ಮೆ ಓಬವ್ವನ ಒನಕೆ. ಹನಿಹನಿಯಾಗಿ ಒಮ್ಮೊಮ್ಮೆ ತನಿ ಆವರ್ತನೆ ವಿನಿಕೆ. ಜಿನುಗುತ್ತದೆ, ಆಕಾಶಕ್ಕೆ ತೂತು ಬಿದ್ದಂತೆ. ಕೆಲವೊಮ್ಮೆ ಪುಷ್ಪವೃಷ್ಟಿ  ಮಣ್ಣಿನ ಕಂಪು ಮೇಲೆದ್ದಂತೆ. ಕೆಲವೊಮ್ಮೆ ಕುಳಿರ್ಗಾಳಿ ಜೊತೆಯಾಗಿ ಬೆಚ್ಚಗೆ ಕಂಬಳಿ ಹೊದ್ದಂತೆ. ಕದ್ದಿಂಗಳು, ಕಗ್ಗತ್ತಲು, ಕಾರ್ಮೋಡದ ರಾತ್ರಿ ಕೋಲ್ಮಿಂಚು, ಗುಡುಗು, ಸಿಡಿಲುಗಳ ಜೊತೆ. ಹೂ ಬಿಸಿಲಲ್ಲಿ ಕೆಲವೊಮ್ಮೆ ಸಪ್ತವರ್ಣದ ಸ್ವರ್ಣಲತೆ. ಶ್ರಾವಣದ ಬಲ್ಸೋನೆಗೆ ಬೇಸತ್ತ  ಮನೋರಮೆಗೆ ಕತೆ ಕೇಳುವ ಉತ್ಸುಕತೆ. ಗೌರಿ ಹಬ್ಬದ ದಿವಸ  ಬೀಳುವ ಗೌರಿ ಜಡಿ. ಕಾಮದಹನದ ಬಳಿಕ   ತಣಿಸಲು ರತಿಯ ದಳ್ಳುರಿ. ನಂಬಲಾರದ ಚಿತ್ತಾ ಮಳೆ . ತುಂಬಿಕೊಡುವ ಉತ್ತರೆ ಮಳೆ. ಧೈರ್ಯವಾಗಿ ಮುಂದೆಯೇ ಕಾರುವ ಮುಂಗಾರು. ಬೆನ್ನಹಿಂದೆ ಕಾರುವ ಹಿಂಗಾರು. ಕಂಗೊಳಿಸುವ ಹಸಿರು ಹೊಳೆ. ಉತ್ತು ಬಿತ್ತು ಪೈರು ಬೆಳೆ. ಟಿವಿಯಲ್ಲಿ ಸದಾ ಕೂಗಾಡುವ ರಣಮಳೆ.

"ಕೆರೆಯಂ ಕಟ್ಟಿಸು, ಬಾವಿಯಂ ಸವೆಸು" ಎಂದು ಕನ್ನಡತಿ ತಾಯಿಯೊಬ್ಬಳು ಒಬ್ಬ ಮಗನಿಗೆ ಹಾಲೂಡಿಸುವಾಗ ಕಿವಿಯಲ್ಲಿ ಹೇಳಿದಳಂತೆ. ಅವನು ಮುಂದೆ ಅಮಾತ್ಯನಾಗಿ ಕೆರೆ-ಕಟ್ಟೆ-ಬಾವಿಗಳನ್ನು ತೋಡಿಸಿದನಂತೆ.  "ಕೆರೆಯಂ ಮುಚ್ಚಿಸು, ಕಟ್ಟಡಮಂ ಕಟ್ಟಿಸು" ಎಂದು ಅದು ಯಾರು ಯಾರ ಕಿವಿಯಲ್ಲಿ ಉಸುರಿದರೋ ಕಾಣೆ. ಬೆಂಗಳೂರಿನ ಅನೇಕ ಎ-ಕೆರೆಗಳು ಎಕರೆಗಳಾಗಿ ಬಿಕರಿಯಾಗಿದ್ದು ಈಗ ಹಳೆಯ ಕಥೆ. ತೊಂಬತ್ತರ ದಶಕದಲ್ಲಿ  ಬೆಂದಕಾಳೂರು ಸಿಲಿಕಾನ್ ವ್ಯಾಲಿಯಾಗಿ ಬದಲಾಗತೊಡಗಿದ್ದು ಅಕ್ಕಪಕ್ಕದ ಊರುಗಳ ಕೆರೆಗಳಿಂದ ಅಹೋರಾತ್ರಿ ಲಾರಿಗಳಲ್ಲಿ ಸಿಲಿಕಾನ್ ಅರ್ಥಾತ್ ಮರಳು ಬಂದು ಬೀಳತೊಡಗಿದಾಗ.  ಆ ಕೆರೆಯ ಮರಳನು ಈ ಕೆರೆಗೆ ಚೆಲ್ಲಿ ವರವ ಪಡೆದ ಭೂಪರು ಏಕಾಏಕಿ ಸಿರಿವಂತರಾದರು.  ತರೀಕೆರೆ ಏರಿ ಮೇಲೆ ಅದೆಷ್ಟು ಕುರಿಗಳು ಮೇಯುತ್ತಿದ್ದವೋ ಗೊತ್ತಿಲ್ಲ. ಬೆಂಗಳೂರಿನ ಕೆರೆ ಏರಿ ಮೇಲಂತೂ ತೋಳಗಳು ಕುರಿಗಳ ಕೈಕುಲುಕಿ ದೇಶಾವರಿ ನಗೆ ಬೀರಿದ್ದನ್ನು ನೋಡಿದವರು ಇದ್ದಾರೆ.   "ಇರುಳು ಕಂಡ ಬಾವಿಯಲ್ಲಿ ಹಗಲು ಬಿದ್ದರಂತೆ" ಎಂಬ ಗಾದೆಯನ್ನು "ಇರುಳು ಕಂಡ ಕೆರೆಯಲ್ಲಿ ಹಗಲು ಇದ್ದರಂತೆ" ಎಂದು ಬದಲಾಯಿಸಬೇಕಾಯಿತು.  ಒಂದು ಘಟನೆ ಹೀಗೂ ನಡೆಯಿತೆಂದು ಹೇಳುತ್ತಾರೆ.   ಅದೆಷ್ಟು ನಿಜವೋ ಕಾಣೆ. ಕೆರೆ-ಎಸ್ಟೇಟಿನ ಮೇಲೆ ಕಟ್ಟಿದ ಬಹುಮಹಡಿ ಕಟ್ಟಡವೊಂದರಲ್ಲಿ ಮೊದಲನೇ ಮಹಡಿಯಲ್ಲಿ ಮನೆ ಖರೀದಿಸಿದವರೊಬ್ಬರು ಗೃಹಪ್ರವೇಶದ ನಂತರದ ದಿನ ಮನೆ ಬಾಗಿಲು...

 ಗಜಲ್ 🌹 ಇನ್ನೆಷ್ಟು ಜಗಳಗಳನ್ನು ತಂದಿಡುವುದೋ ಚಾಟ್ ಜಿಪಿಟಿ ಅದನ್ನೂ ನೀನೇ ಹೇಳಿಬಿಡು ಚಾಟ್ ಜಿಪಿಟಿ ಎಷ್ಟು ತ್ರಿಶಂಕುಗಳಿಗೆ ನೀನು ಕೊಡಿಸುವೆ ಮುಕ್ತಿ ಅದನ್ನೂ ನೀನೇ ಹೇಳಿಬಿಡು ಚಾಟ್ ಜಿಪಿಟಿ ಹುಟ್ಟುವ ಮಕ್ಕಳ ಮಿದುಳಲ್ಲಿ ಚಾಟ್ ಜಿಪಿಟಿ - ಚಿಪ್ಪು ಜೋಡಿಸಬಹುದೇ ಹೇಳು ಚಾಟ್ ಜಿಪಿಟಿ ಮಾತಾಡಿಕೊಳ್ಳುತ್ತಾರೆ ಸ್ಕ್ರೋಲ್ ಮಾಡುತ್ತ ಪಿಟಿಪಿಟಿ ನಿನ್ನದೇ ಜಪ ಮಾಡುತ್ತಾರೆ ಚಾಟ್ ಜಿಪಿಟಿ ಎಲ್ಲರೂ ಜಾಣರಾಗಿ ಸಿದ್ಧವಾಗಿದೆ ಸ್ಮಾರ್ಟ್ ಸಿಟಿ ಹೇಳು ಇನ್ನೇನು ಬೇಕು ಜೀವಕ್ಕೆ, ಚಾಟ್ ಜಿಪಿಟಿ ಗಜಲ್ 🌹🌹  ಎಲ್ಲ ಕೆಲಸಗಳನ್ನೂ ಮಾಡಲಿದೆ ಏಐ  ಕೈಗೆ ಕೆಲಸವಿಲ್ಲದೆ ಮಿಲಾಯಿಸೋಣ ಕೈಕೈ ಎಲ್ಲರಿಗೂ ಎಲ್ಲ ನೀಡಲಿದೆ ಏಐ ತಾಳು ಮನವೇ ಸುಮ್ಮನೇ ತಲ್ಲಣಿಸದಿರೈ ಎಲ್ಲರಿಗೂ ವಿದ್ಯೆ ನೀಡಲಿದೆ ಏಐ  ಹೇಳಿರಿ ಎಲ್ಲರೂ ವಿದ್ಯಾ ಏಐಪತಿಕೀ ಜೈ ಎಲ್ಲರಿಗೂ ಬುದ್ಧಿ ನೀಡಲಿದೆ ಏಐ  ಎಲ್ಲರಿಗೂ ಸದ್ಬುದ್ಧಿಯೇ ಎಂದು ಹೇಳಲಾಗದೈ  ಎಲ್ಲರಿಗೂ ಜ್ಞಾನ ನೀಡಲಿದೆ ಏಐ  ಗುರುಪೂರ್ಣಿಮೆಯ ದಕ್ಷಿಣೆ ಏಐಗೆ ನೀಡಿರೈ

  ಬ್ಯಾಗ್ ಭಾಗ್ಯ ಎಲ್ಲರ ಮನೆಯಲ್ಲೂ ಇರುತ್ತದೆ ಒಂದಲ್ಲ ಹತ್ತು ಬ್ಯಾಗುಗಳ ಸಂಗ್ರಹ ಬಿಚ್ಚಿ ನೋಡಿದರೆ ಬೇರೇನೂ ಇರದು ಇನ್ನಷ್ಟು ಬ್ಯಾಗುಗಳ ವಿನಃ ಕೆಲವು ಪ್ಲಾಸ್ಟಿಕ್ ಕೆಲವು ದಪ್ಪ ಕಾಗದ ಮೇಲೆ ಆಕರ್ಷಕ ಚಿತ್ರ, ಬರಹ. ಎಸೆಯಲು ಮನಸ್ಸಾಗದೆ ಎಲ್ಲವೂ ಸೇರುತ್ತವೆ ಬ್ಯಾಗುಗಳ ಸಂಗ್ರಹ. ಮಾಡಲು ಹೊರಟಾಗ ಶಾಪಿಂಗ್ ಬ್ಯಾಗ್ ಮರೆಯುತ್ತದೆ ಅಯ್ಯೋ ಹಣೆಬರಹ. ಮರಳಿ ಬಂದಾಗ ಇನ್ನಷ್ಟು ಬೆಳೆಯುತ್ತದೆ. ಬ್ಯಾಗು ಗ ಳ ಸಂ ಗ್ರಹ . C.P. Ravikumar

ಕಂಗಳಲಿ ಒಂದು ಕಥನ ಒಂದಿಷ್ಟು ಮೋಡ ಒಂದಿಷ್ಟು ನೀರು ಮತ್ತೊಂದು ಕಥನ ನಯನದ್ವಯ ಜಲಧಾರೆಯ ಹರಿಸುತ್ತಿರುವುವು  ಕಿವಿಗೊಡುವಿರೋ ಯಾ ಇಲ್ಲವೋ ಹೇಳುತ್ತಿರುವುವು ವಹಿಸಿದರೂ ಗಹನ ಮೌನ ನಿಂತಾಗ ಕಂಬನಿಧಾರೆಯು, ಮಾತೂ ಮುಗಿವುದು ಮಾತನ್ನು ಕೇಳಿಸಿಕೊಂಡರೆ ಏನೋ ಸಿಗುವುದು ಹಳೆಯದು ಹಾಗೂ ನವೀನ ಇರುಳೊಂದು ಜಾರಿದಕೂಡಲೆ ಇರುಳೇ ಕವಿದಿದೆ ಮರೆತಿರುವ ಯಾವುದೋ ಮಾತು ನಾಲಿಗೆಯ ಮೇಲಿದೆ ನೂರೆಂಟು ನುಡಿವ ನಯನ ಮೂಲ : ಗುಲ್ಜಾರ್ ಕನ್ನಡಕ್ಕೆ: ಸಿ ಪಿ ರವಿಕುಮಾರ್ ಚಿತ್ರ: ಮಾಸೂಮ್ 

  ನೂರು ವರ್ಷಗಳ ತರುವಾಯ ನನ್ನ ಕವಿತೆ ಓದುತ್ತ ನಿಂತಿರುವೆ, ಯಾರು ನೀನು? ನಿನಗಾಗಿ ಈ ವಸಂತಸಂಪದದಿಂದ  ಕಳಿಸಲಾರೆ ಒಂದಾದರೂ ಹೂವನ್ನು. ಮುಗಿಲುಗಳ ಸ್ವರ್ಣಿಮ ಅಂಚುಗಳಿಂದ ನಿನಗಾಗಿ ಕಳಿಸಲಾರೆ ಒಂದಾದರೂ ಹೊನ್ನರೇಖೆ. ನಿನ್ನ ಬಾಗಿಲು ತೆರೆದು ನೋಡಿದರೆ ಹೊರಗಡೆಗೆ ಕಾಣುವುದು ಮುಗುಳುಗಳ ಹೊತ್ತ ಶಾಖೆ ಬಿಡಿಸಿಕೋ ನೂರು ವರ್ಷಗಳ ಹಿಂದೆ ಹೀಗೇ ಅರಳಿ ಮಾಯವಾದ ಕುಸುಮಗಳ ಗಂಧ: ಪ್ರಫುಲ್ಲ ಮನದ ಉದ್ಯಾನದಲ್ಲಿ ಕೇಳಲಿ ನೂರು ವರ್ಷಗಳ ಹಿಂದೆ ಜೀವನಾನಂದದಿಂದ  ಹೀಗೇ ವಸಂತದ ಒಂದು ಸುಂದರ ದಿವಸ ಹಾಡಿದ ಒಂದು ಕೋಕಿಲ ಕಂಠದದುಲ್ಲಾಸ. ಮೂಲ: ರವೀಂದ್ರನಾಥ ಟ್ಯಾಗೋರ್  ಕನ್ನಡಕ್ಕೆ: ಸಿ ಪಿ ರವಿಕುಮಾರ್

ಮೂಲ: ಜಾಯ್ ಸಲೈವನ್  ಕನ್ನಡಕ್ಕೆ: ಸಿ ಪಿ ರವಿಕುಮಾರ್  ಅದೆಷ್ಟು ದಿನ ಕಾದಿದ್ದೆ ನಾನು ಪ್ರೀತಿಗಾಗಿ ಒಮ್ಮೆಲೇ ದೊರೆಯಿತು ತೋಟದಲ್ಲಿ ಇಂದು ಸೂರ್ಯನ ಶಾಖಕ್ಕೆ ಮಾಗಿ ಕೈತುಂಬಿದವು ಚರಾಸ್ತಿಯಂತೆ ಬೊಗಸೆಗೆ ಬಂದು. ಸಂಜೆಯ ಅಡುಗೆಗೆ ಈಳಿಗೆಮಣೆಯನ್ನೇರಿ  ಉಪ್ಪುಮೆಣಸುಗಳ ಸಿಂಗಾರ ಹೇರಿ ಬ್ರೆಡ್ ತುಂಡುಗಳ ನಡುವೆ ಸೇರಿಕೊಳ್ಳುತ್ತವೆ. ನನ್ನ ನಿತಂಬಗಳು ಹಣ್ಣಾಗುತ್ತವೆ. ಹಣ್ಣಾಗುತ್ತದೆ ನಿನ್ನ ಗಡ್ಡ. ಶೇಖರವಾಗುತ್ತದೆ ಅಂಚೆಗಳ ಗುಡ್ಡ. ಫೋನ್ ಕರೆಗಳಿಗೆ ಉತ್ತರಿಸಲು ಆಗುತ್ತಿಲ್ಲ. ಕ್ಷಮಿಸಿ, ಟೊಮೇಟೋ ತುಂಬಿದೆ ನಮ್ಮ ಬಾಯ್ತುಂಬ. ನಾವು ತೀರಾ ವ್ಯಸ್ತರಾಗಿದ್ದೇವೆ  ಅಲ್ಪರಾಗಿ, ಹಸಿದವರಾಗಿ, ತೊಟ್ಟು ಬಾಳ್ವೆಯ ಬಂಧ.

  ಸಿ ಪಿ ರವಿಕುಮಾರ್ (ಮಹಾದೇವಿ ವರ್ಮಾ ಅವರ ಹಿಂದಿ ಕವಿತೆಯನ್ನು.ಆಧರಿಸಿ) ಹರಿದ್ವಾರದಲ್ಲಿ ಒಂದು ಸಂಜೆ. ಗಂಗೆಗೆ ಆರತಿ ನಡೆಯುತ್ತಿತ್ತು.  ಜನ ತಮ್ಮ ಕೈಗಳಲ್ಲಿ ಆರತಿಯ ತಟ್ಟೆಗಳನ್ನು ಹಿಡಿದು ನಿಂತಿದ್ದರು. ಬಿದಿರಿನ ತಟ್ಟೆಗಳ ಮೇಲೆ ಹಸಿರು ಎಲೆಗಳನ್ನು ಹಾಸಿ ಮೇಲೆ ಹೂವುಗಳನ್ನು ಇರಿಸಲಾಗಿತ್ತು. ಪ್ರತಿಯೊಂದು ತಟ್ಟೆಯಲ್ಲೂ ಒಂದು ದೀಪ.  ಗಂಗೆಯನ್ನು ಪ್ರಾರ್ಥಿಸಿ ಅವಳು ದೀಪವನ್ನು ತೇಲಿಬಿಟ್ಟಳು. ನದಿಯ ಇನ್ನೊಂದು ದಡದಲ್ಲಿ ಅವನು ಕೂಡಾ ದೀಪವನ್ನು ತೇಲಿಬಿಟ್ಟನು. ಅವಳ ಕೈಯಲ್ಲಿ ಪೂಜೆ ಮಾಡಿಸಿದ ಅರ್ಚಕ "ಮನಸ್ಸಿನಲ್ಲಿ ನಿನ್ನ ಆಸೆ ಹೇಳಿಕೋ. ಗಂಗಾ ಮಾತೆ ಖಂಡಿತ ಪೂರೈಸುತ್ತಾಳೆ" ಎಂದು ಹೊರಟು ನಿಂತ. ಅವಳು ಕಣ್ಮುಚ್ಚಿ ಧ್ಯಾನಸ್ಥಳಾದಳು. ತಾನು ಹಚ್ಚಿದ ದೀಪವು ತೇಲುತ್ತಾ ಹೋಗುವುದನ್ನು ನೋಡುತ್ತಾ ನಿಂತಳು. ಸ್ವಲ್ಪ ಹೊತ್ತಿನ ನಂತರ ದೀಪವು ಕಾಣದಂತೆ ಮರೆಯಾಯಿತು. ದೂರದ ದಡದಲ್ಲಿ ಅವನ ಜೊತೆ ಇದ್ದ ಹುಡುಗರು "ಏನು ಕೇಳಿಕೊಂಡೆ ಗಂಗಾಮಾತೆಯಲ್ಲಿ?" ಎಂದು ರೇಗಿಸಿದರು. ಅವಳು ಹಚ್ಚಿದ ದೀಪ ತೇಲುತ್ತಾ ಹೋಗುತ್ತಿತ್ತು. ಅವನು ಹಚ್ಚಿದ ದೀಪ ಓಲಾಡುತ್ತಾ ಅವಳ ದೀಪವನ್ನು ಸಮೀಪಿಸಿತು. ಎರಡೂ ದೀಪಗಳು ಪರಸ್ಪರ ನೋಡಿ ಒಟ್ಟಿಗೆ ತೇಲುತ್ತಾ ಸಾಗಿದವು. ಅವುಗಳ ಅಕ್ಕಪಕ್ಕದಲ್ಲೂ ಅಸಂಖ್ಯ ದೀಪಗಳು ಮಿನುಗುತ್ತಾ ಸಾಗುತ್ತಿದ್ದವು.   ಸಂಜೆ ಕಳೆದು ಕತ್ತಲು ಆವರಿಸಿದಂತೆ ದೀಪಗಳು ನದಿಯಲ್ಲಿ  ತೇಲಿಕೊಂಡು ಹೋಗುವ ದೃಶ್ಯ ಎಲ್ಲ...

ಕವಿಗಳು ಅತ್ಯಂತ ಧೈರ್ಯಶಾಲಿಗಳ ಸಾಲಿನಲ್ಲಿ ನಿಲ್ಲುತ್ತೇವೆ. ಬೇರೆಯವರು ಮುಚ್ಚಿಡುವುದನ್ನು ನಾವು ಬಿಚ್ಚಿ ತೋರುತ್ತೇವೆ ನಾಜೂಕಾದದ್ದನ್ನು ಮೇಲೆತ್ತಿ ಅದರ ಮೇಲೆ ಬೆಳಕು ಚೆಲ್ಲಿ ಪಿಸುಗುಡುತ್ತೇವೆ "ನೋಡಿ, ಅನುಭವಿಸುವುದು ಎಂದರೆ ಇದೇ." ಹೃದಯ ಛಿದ್ರವಾದಾಗಲೂ ಅದಕ್ಕೆ ನೀಡುತ್ತೇವೆ  ಭಾಷೆಯ ಬ್ಯಾಂಡೇಜು ಹತ್ತಿ ಎಷ್ಟೇ ಉರಿಯಾದರೂ ಮಸಿಯು ಔಷಧವೆಂಬ ನಂಬಿಕೆ ಬಿತ್ತಿ  ಬರವಣಿಗೆ ಮುಂದುವರೆಸುತ್ತೇವೆ,  ಏಕೆಂದರೆ ಎಲ್ಲಾದರೂ ಇದ್ದಾರು ಜನ ಯಾರಿಗೆ ಬೇಕೋ ತಮ್ಮಂತೆ ನಡುಗುವವರು ಇನ್ನೂ ಇದ್ದಾರೆಂಬ ಸಾಂತ್ವನ. ಮೂಲ: ತಾಲಿಯಾ ಕ್ಲೆಮ್  ಕನ್ನಡಕ್ಕೆ: ಸಿ ಪಿ ರವಿಕುಮಾರ್